Taksıst áleýmettik fılmder túsiredi - SQO
PETROPAVL. QazAqparat – Soltústik Qazaqstan oblysynda taksı júrgizýshisi qysqa metrajdy áleýmettik fılmder túsirip, eki kartına da áleýmettik jelide kórermenderdiń jaqsy baǵasyn aldy, dep habarlaıdy QazAqparat tilshisi.
«Statýs ottsa» dep atalatyn bul fılm – Damır Makımkenovtyń ekinshi jumysy.
Qysqa metrajdy fılm 11 mınýtqa shaqtalǵan. 4 keıipker bar: olar ákesi, anasy, qyzy jáne jigit. Stsenarıı boıynsha jigit baı otbasynan shyqqan, tárbıesi nashar. Qarapaıym mamandyq ıelerin, qara jumysshylardy mensinbeıdi.
«Statýs ottsa» fılminde oqıǵa jelisi oıdan alynǵanymen, mundaı jaǵdaılar ómirde, ókinishke oraı kezdesip turady. Baılardyń nemese laýazymdy adamdardyń ózin basqalardan joǵary ustaýy, mensinbeýi. Meniń maqsatym osyndaı adamdarǵa oı salyp, olardy ózderine syrttarynan kórsetý edi. Ómir alma-kezek ekenin umytpaǵanymyz jón», - deıdi Damır Makımkenov.
Áleýmettik fılmniń avtory da, rejısseri de Damırdiń ózi. Kásibı bilimi joq. Taksı júrgizýshisi bolyp jumys isteıdi. Fılm túsirý – Damırdiń hobbıi.
«Internetten elimizdiń basqa qalalarynda túsirilgen qysqa metrajdy fılmderdi qyzyǵa qarap júrdim. Keıin nege maǵan da osyndaı bir fılm túsirip kórmeske degen oı keldi. Otyryp, stsenarıı jazyp shyqtym. Týǵan- týysyma kórsetip edim – unatty. Taǵy birnesheýin jazyp, qoldaý taptym.
Keıin operator Maksım Glotkovpen tanystym, ol jumys isteýge kelisti», - deıdi áýesqoı rejısser.
Aıtýynsha, arnaıy oqýyn oqymasa da, bul fılmdi túsirý qıynǵa soqpaǵan.
«Stsenarııdi jazysymen úıdegilerge, dostaryma kórsetip, pikirlerin bildim. Orys-drama teatrynyń myqty rejısseri bar Vıktor Shalaev degen, sol kisige kórsetemin. Qaraǵandyda Tórebek Oryn degen rejısser bar. Ol kisi «Gonkı», «Ego» fılmderin túsirgen. Onymen áleýmettik jeli arqyly tanystyq. Solarǵa kórsetip, aqyl-keńesterin alamyn», - deıdi Damır.
Stsenarııdi ol 4 kúnniń ishinde tolyq jazyp shyqqan. Al fılmdi bir kúnniń ishinde, tańerteńnen keshke deıin túsirgen.
«Akterlerdi onlaın kastıng ótkizip, tańdap aldym. Jurt áleýmettik jeli, túrli messendjerler arqyly fotolaryn jiberdi. Sondaı-aq N.Pogodın atyndaǵy oblystyq orys-drama teatrynyń dırektory Spartak Ramazanov maǵan basty rólderge akterlerdi iriktep alýǵa kómektesti. Ákeniń rólin qýyrshaq teatrynyń sahnageri Sapar Mapenov somdady. Ananyń rólinAıgúl Kenjeǵozına-Hasenova oınap shyqty. Akterler de meniń oıymdy birden túsinip, tez til tabystyq», - deıdi fılm avtory.
Qysqa metrajdy fılm Beskól aýyly men Petropavldyń yqshamaýdandarynda túsirilgen.
«Kınony jaryqqa shyǵarýǵa bir tıyn qarajat jumsalmady. Oǵan basty sebep - fılmde ózekti máseleniń qozǵalýy dep bilemin. Ideıasy unaǵandyqtan akterler de qarajat suramady. Keıin áleýmettik jelilerge, toptarǵa ornalastyrýda da qıyndyq kórgen joqpyn.
Alǵashqy fılmim – «Dedýshka» da kórermenderdiń jaqsy baǵasyn aldy. Munymen toqtap qalmaımyn. Qazir eki stsenarıı jazyp jatyrmyn. Onyń bireýi – «Dedýshkanyń» jalǵasy. Ekinshisi kópke úlgi bolarlyq jigit týraly. Tájirıbe jınaǵannan keıin tolyq metrajdy fılm túsirý josparymda bar.
Men qarapaıym otbasydan shyqqanmyn. Anam - úı sharýasyndaǵy áıel, ákem – traktorıst. Sol sebepti de shyǵar, qarapaıym adamdardyń ómirin kórsetemin. Áli de áleýmettik kınolar túsirý josparda bar. Biraq janrdy ózgertpekpin. Qyzyqty oqıǵalardy negizge alyp, sol jaıynda ekranǵa shyǵaryp kórgim keledi», - deıdi Damır Makımkenov.
