Taksıde jumys isteıtinderdiń quqyǵyn qorǵaýdy kúsheıtý kerek – depýtat
ASTANA. KAZINFORM – Senator Bıbigúl Jeksenbaı platformalyq jumyspen qamtýdy quqyqtyq retteý jáne tsıfrlyq servıster arqyly jumys isteıtin azamattardyń quqyqtaryn qorǵaý máselesin kóterdi.
Osy oraıda depýtat Úkimet basshysynyń atyna joldaǵan óz saýalynda sońǵy jyldary Qazaqstanda onlaın-platformalar arqyly, ásirese jetkizý jáne jolaýshylar tasymaly salasynda jumyspen qamtý qarqyndy damyp kele jatqanyn atap ótti.
Sarapshylardyń baǵalaýynsha, 394 myńǵa jýyq azamat tsıfrlyq servıster arqyly tabys taýyp otyr, al ınternet-platformalardy oryndaýshylardyń jalpy sany kóbeıip keledi.
Saýalda platformalyq oryndaýshylarda negizgi eńbek kepildikteriniń joqtyǵyna, sonyń ishinde tabystyń turaqsyzdyǵyna, saqtandyrýdyń bolmaýyna, daýlardy sheshýdiń ashyq tetikteri men platformalar tarapynan qabyldanatyn birjaqty sheshimderden qorǵaýdyń joqtyǵyna erekshe nazar aýdaryldy. Osyǵan baılanysty halyqaralyq tájirıbe bul salany júıeli retteýge kóshý qajettigin kórsetip otyr.
- Tsıfrlyq jáne salyq boıynsha ınfraqurylymdy retteý boıynsha memlekettik júıeler men platformalar arasyndaǵy ıntegratsııany retke keltirip, aqparattyq qatelikterden týyndaǵan barlyq negizsiz bereshekter men ósimpuldardy avtomatty túrde joıý tetigin engizýdi qarastyrý kerek. Salyq júktemesin jeńildetý úshin áleýmettik tólemderdi esepteý kezinde shyǵyndardy, ıaǵnı janarmaı, kólik jóndeýdi shegerip tastaý ádistemesin de qarastyrýdy oılastyrý kerek. Quqyqtyq mártebe jáne tarıftik kepildikter baǵytynda platformalyq jumystyń erekshelikterin eskeretin jeke zańnamalyq akt ázirleýdi, onda «táýelsiz qyzmetker» mártebesin bekitip, eń tómengi saǵattyq tólem standarttaryn engizýdi qarastyrý kerek, - dedi Bıbigúl Jeksenbaı.
Sonymen qatar ol platformalardaǵy oryndaýshylardy saqtandyrý máselesine nazar aýdarý kerek ekenin aıtty.
Senator bul salada júıeli zańnamalyq sharalardy ázirleý eńbek naryǵynyń ashyqtyǵyn arttyrýǵa, azamattardyń quqyqtaryn qorǵaýdy qamtamasyz etýge jáne eldegi platformalyq ekonomıkanyń turaqty damýyna jaǵdaı jasaýǵa múmkindik beretinin málim etti.
Aıta keteıik, byltyr depýtattar Qazaqstanda taksı salasynda 500 myńnan astam adam eńbek etetinin, alaıda bul naryq áli kúnge deıin jetkilikti deńgeıde rettelmeı otyrǵanyn málimdegen edi.
