Taksıdi jeleý etip, jezókshelerdi tasyǵan: Qostanaı oblysynda uıymdasqan top áshkerelendi
QOSTANAI. KAZINFORM - Qostanaı oblysy polıtsııa departamenti Uıymdasqan qylmysqa qarsy kúres basqarmasynyń qyzmetkerleri taksı qyzmetiniń atyn jamylyp, ıntımdik qyzmetti uıymdastyryp, jezókshelikpen aınalysqan uıymdasqan qylmystyq toptyń qyzmetin toqtatty, dep habarlaıdy Qostanaı oblystyq polıtsııa departamentiniń baspasóz qyzmeti.
Baspasóz qyzmetiniń málimetterine qaraǵanda, tergeý barysynda qyzdardyń qaladaǵy birneshe saýnaǵa jetkizilip, onda ıntımdik qyzmet kórsetkeni anyqtaldy. Tizimde 12 saýna bar. Polıtsııa saýnalardyń ákimshilerin jáne aqyly ıntımdik qyzmet kórsetken tulǵalardy anyqtady.
Qylmystyq top aýyldardan shyqqan, áleýmettik turǵydan osal jáne az qamtylǵan otbasylardan shyqqan jas qyzdardy aldap, qorqytý jáne kúsh qoldaný arqyly jezókshelikke tartqan. Olardy jaldamaly páterler men garajdarda ustap otyrǵan.
Qazirgi ýaqytta QR Qylmystyq kodeksiniń bes baby boıynsha birneshe qylmystyq is qozǵalyp, sotqa deıingi tergeý júrgizilip jatyr.
Birqatar kúdikti ustalyp, basqa qatysýshylarǵa qatysty protsessýaldyq májbúrleý sharalary qoldanyldy.
Tintý barysynda kóp mólsherde qolma-qol aqsha, qujattar, tehnıka, banktik kartalar jáne qylmystyq qyzmet barysynda paıdalanylǵan dep boljanǵan toǵyz avtokólik tárkilendi.
Sonymen qatar, qylmystyq jolmen alynǵan qarajattyń bir bóligi jalǵan banktik shot arqyly zańdastyrylǵany anyqtaldy. Bul qarajat kólik, tirkeme jáne garajdar satyp alýǵa jumsalǵan.
-Atalǵan fakti boıynsha «Qylmystyq jolmen alynǵan kiristerdi zańdastyrý» babymen bólek is qozǵaldy. Tergeý jalǵasyp jatyr. Іshki ister organdary jeńgetaılyq pen ıntımdik qyzmet kórsetý arnalaryn anyqtaý jáne jolyn kesý boıynsha jumysty jalǵastyrady,-delingen habarlamada.