Taksı júrgizýshisi, kýrer, rıeltor: jeke kásipker retinde tirkelý tıimdi me

ASTANA. KAZINFORM – Memlekettik kirister komıteti ınternet platformalar arqyly qyzmet usynatyn jandardyń salyq tóleý erejelerin túsindirdi. Tolyǵyraq atalǵan komıtettiń arnaýly salyq rejımderin ákimshilendirý basqarmasynyń basshysy Erqanat Shymbergen aıtyp berdi.

«Elimizde birqatar azamat qyzmetin ınternet platformalardyń kómegimen júzege asyrady. Ol degenimiz taksı júrgizýshileri, kýrer, páterdi jalǵa berýmen aınalysý taǵy sol sııaqty qyzmet túrleri. Atalǵan qyzmetterdi usynýshylardyń salyq tóleý jáne olardy áleýmettik turǵydan qamtý, qorǵaý turǵysynan máseleler týyndap otyr. Osy oraıda ótken jyly Áleýmettik kodekste atalǵan máseleler boıynsha anyqtama berilip, naqtylandy. Bizdiń komıtet bul jobany taksı platformasymen kelisim jasap, pılottyq joba túrinde iske qosty. Búginde 23 myń jeke kásipkerden (taksı júrgizýshileri) 700 mln teńgege jýyq teńge salyq tústi. Pılottyq joba aıasynda jeke kásipker retinde tirkeýde jáne salyq mólsherlemesi (1%) boıynsha jeńildik qarastyrylǵan. Odan bólek taksı júrgizýshileri taksoparkke tóleıtin qosymsha komıssııadan bosatylýy múmkin», - dedi Erqanat Shymbergen komıtette ótken baspasóz máslıhatynda. 

Onyń sózinshe, jańa joba arqyly salyq tóleý protsesin tolyqtaı avtomattandyrý kózdelip otyr. 

«Pılottyq jobany júzege asyrý nátıjeleri boıynsha Salyq kodeksine ózgerister engizilip, bıyl 1 qyrkúıekten bastap zańdy kúshine endi. Aldymen salyq mólsherlemesin 1% etý, ıaǵnı tabysynyń áleýmettik tólemderge 1% salyq, MÁMS-ke 1%, zeınetaqy jınaǵyna 1% jáne 1% áleýmettik jarna salyǵyn tóleıdi. Internet platformalar ıelerine talap qoıylady, ıaǵnı taksı júrgizýshileri nemese kýrerler úshin salyq agenti mindetin atqarady. Internet platformalar arqyly qyzmet usynatyndar jeke kásipker retinde tirkelse, tabysynyń 1% salyq tóleıdi, al tirkelmegen jaǵdaıda 10% tóleýge májbúr», - deıdi spıker. 

Buǵan deıin Qazaqstanda qosylǵan qun salyǵyn tsıfrlyq teńgemen tóleýge bolatynyn habarlaǵanbyz.