Taksı júrgizýshileriniń jarty mıllıonnan astamy jańa salyq rejımine kóshti
ASTANA. KAZINFORM – Qazaqstanda ózin-ózi jumyspen qamtyǵandar úshin engizilgen arnaýly salyq rejımin 519,7 myń adam taksı qyzmetin kórsetýge paıdalanyp otyr. Al ınternet-platformalar arqyly jumys isteıtin azamattar úshin 16,1 mlrd teńge áleýmettik tólem aýdarylǵan. Bul týraly Premer-mınıstrdiń orynbasary – Ulttyq ekonomıka mınıstri Serik Jumanǵarın Quryltaı depýtattarynyń saýalyna bergen jaýabynda málimdedi.
Mınıstrdiń jaýabyna sáıkes, 2026 jylǵy 1 qazandaǵy jaǵdaı boıynsha ózin-ózi jumyspen qamtyǵandarǵa arnalǵan arnaýly salyq rejımin 981,2 myń adam qoldanǵan. Olardyń 866,9 myńy ınternet-platformalar arqyly qyzmet kórsetse, 114,2 myńy óz betinshe jumys isteıdi.
Bul rejımdi paıdalanatyndardyń basym bóligi taksı jáne kýrerlik qyzmetke tıesili. Atap aıtqanda 519,7 myń adam jolaýshy tasymaldaýmen, taǵy 292,5 myń adam kýrerlik qyzmetpen aınalysady. Eki baǵyttaǵy azamattardyń úlesi atalǵan salyq rejımin qoldanýshylardyń 83%-y.
Mınıstrdiń málimetinshe, ınternet-platformalar arqyly jumys isteıtin 866,9 myń azamat úshin jalpy somasy 16,1 mlrd teńge áleýmettik tólem aýdarylǵan. Onyń ishinde mindetti zeınetaqy jarnalaryna 4,4 mlrd teńge, jumys berýshiniń mindetti zeınetaqy jarnalaryna 3,8 mlrd teńge, áleýmettik aýdarymdarǵa 3,9 mlrd teńge jáne mindetti áleýmettik medıtsınalyq saqtandyrýǵa 4,1 mlrd teńge baǵyttalǵan.
Serik Jumanǵarınniń aıtýynsha, 2026 jylǵy 1 qazandaǵy jaǵdaı boıynsha jańa rejımge qatysýshylardyń 807,3 myńy osy júıege jańadan qosylǵan azamattar.
Bıyl jeke kásipker retinde tirkeýden shyqqan azamattardyń bári birdeı kásibin toqtatqan joq. Mınıstrdiń jaýabyna sáıkes, 2026 jyldyń alǵashqy toǵyz aıynda 356,2 myń jeke kásipker esepten shyǵarylǵan. Olardyń arasynda ótken jyly múlde tabys tappaǵandar da bar.
Atap aıtqanda qyzmetin toqtatqan jeke kásipkerlerdiń 73,9 myńy ózin-ózi jumyspen qamtyǵandarǵa arnalǵan jańa salyq rejımine kóshken. Taǵy 151,8 myń kásipkerdiń 2025 jyly tabysy bolmaǵan. Al 102,4 myń adamnyń jyldyq tabysy 10 mln teńgege deıin jetken.
Tirkeýden shyqqan jeke kásipkerlerdiń keminde 225,7 myńy buryn belsendi jumys istemegen nemese qyzmetin basqa mártebede jalǵastyrǵan azamattarǵa tıesili.
Aıta keteıik, buǵan deıin, kýrer, taksı júrgizýshileri men frılanserler úshin jańa ereje ázirlengenin jazǵan edik.
