Taksı júrgizýshilerine jańa talaptar engizildi
ASTANA. KAZINFORM – Endi taksı qyzmetin shaqyratyn qosymsha arqyly jumys istegisi keletinder ákimdikke «taksıst» ekenin habarlaýy tıis. Sondaı-aq jolaýshy tasıtyn júrgizýshige rólde 9 saǵattan artyq otyrýǵa tyıym salynady.
– «Avtomobıl kóligi týraly» zańǵa sáıkes, taksımen tasymaldaýdy júzege asyrý úshin tıisti jergilikti atqarýshy organǵa eGov portaly arqyly habarlama jiberiledi. Jergilikti atqarýshy organda taksımen tasymaldaýshylardyń arnaıy tizimi qalyptastyrylady. Kez kelgen tasymaldaýshy osy tizimde bolýy tıis jáne zańmen bekitilgen talaptardy oryndaýǵa mindetti, - deıdi QR Kólik mınıstrliginiń respýblıkaishilik avtomobıl tasymaldary basqarmasynyń basshysy «Búgin LIVE» baǵdarlamasyna bergen suhbatynda.
Jádiger Tilegen endi jeke tulǵalar da taksıst bolyp qyzmet ete alatynyn aıtty.
– Bıyl qańtardan bastap Áleýmettik kodeks sheńberinde «Avtomobıl kóligi týraly» zańǵa engizilgen túzetýler kúshine endi. Buǵan sáıkes, taksımen tasymaldaýdy endi jeke tulǵalar da júzege asyra alady. Buǵan deıin tek jeke kásipkerler men zańdy tulǵalarǵa ǵana ruqsat beriletin. Qazir jeke kásipkerler men zańdy tulǵalardyń zańnamany saqtaýyna jumys berýshi jaýap beredi. Al jeke tulǵalardyń zań talaptaryn oryndaýyn taksı qyzmetin usynatyn mobıldi qosymshalar qadaǵalaýy tıis. Demek, zańnamanyń saqtalýyna atalǵan mobıldi qosymshalar jaýapty, - deıdi mınıstrlik mamany.
Stýdııa qonaǵy taksı shaqyrýǵa arnalǵan mobıldi qosymshalardyń jaýapkershiligine toqtaldy.
– Eger taksı shaqyrýǵa arnalǵan mobıldi qosymshalardyń qyzmeti zańsyz bolsa, olardyń jumysyn shekteý nemese baqylaýǵa alý máselesi týyndaıdy. Bul rette keıbir máseleler Kólik mınıstrliginiń quzyretine, al keıbiri Іshki ister mınıstrliginiń quzyretine kiredi. Mınıstrlik pen ІІM birlesken jumystar júrgizip jatyr. Qandaı da bir zańbuzýshylyqtar anyqtalǵan jaǵdaıda, iri taksı qosymshalaryna olqylyqtar týraly habarlanady jáne olardyń qyzmetiniń zańǵa sáıkes bolýyn talap etiledi. Taksı tasymaldaýshylar tarapynan da, mobıldi qosymshalar tarapynan da zań buzýshylyqtar bolsa, qoldanystaǵy zańnamaǵa sáıkes tıisti shara qoldanylady. Odan bólek, Kólik mınıstrligi men Іshki ister mınıstrligi birlesip jyl saıyn reıdtik sharalar júrgizedi. Atalǵan is-sharalar barysynda zańbuzýshylyqqa jol bergen taksı júrgizýshileri anyqtalsa, olarǵa aıyppul salynady, - dedi ol.
Aıta keteıik, 2024 jyly Astananyń ózinde kólik polıtseıleri 500-den astam zańsyz taksı júrgizýshilerin ákimshilik jaýapkershilikke tartqan. Vedomstvonyń statıstıkasyna súıensek, bıyl júrgizýshini medıtsınalyq tekserissiz, kólikti tehbaqylaýsyz jibergeni úshin jalpy 15,5 mıllıon teńge, al eńbek rejımin buzǵany úshin 78 mıllıon teńgeden astam aıyppul salynypty.
Buǵan deıin Aqmola oblysynda zańsyz jumys istep júrgen 440 taksı júrgizýshisi anyqtalǵany týraly jazǵan edik.