Taksı júrgizýshileri salyqty qalaı tóleıdi
ASTANA. KAZINFORM – Qarjy mınıstrliginiń Memlekettik kirister komıteti jańa Salyq kodeksi jobasynyń keıbir erejelerin jarııa etti.
«Qazirgi ýaqytta jańa Salyq kodeksin ázirleý jónindegi jumys toby quryldy. Ol 2025 jyldan qoldanysqa engiziledi. Kodeks aıasynda arnaýly salyq rejımderin reformalaý jáne ózin ózi jumyspen qamtyǵandar úshin salyq rejımin qurý boıynsha máseleler de qarastyrylyp jatyr», - dep atap ótedi memlekettik organ agenttiktiń resmı saýalyna bergen jaýabynda.
Komıtet 2023 jyldyń qyrkúıeginde Eńbek jáne halyqty áleýmettik qorǵaý mınıstrligimen birge Memleket basshysynyń «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýynda jumyspen qamtýdyń jańa túrlerin retteý tetikterin ázirleý baǵytynda bergen tapsyrmalaryn oryndaýǵa kiristi. Onyń ishinde ınternet-platformalar arqyly júzege asyrylatyn jumys túrleri bar. Internet-platformalar arqyly qyzmet kórsetetin tulǵalarǵa salyqtyq ákimshileýdiń ózge de túrlerin qoldaný boıynsha pılottyq joba júrgizilip jatyr.
«Platformalyq jumyspen qamtý jónindegi pılottyq joba ınternet-platforma arqyly taksı qyzmetin kórsetetin, kýrerlik jetkilimdi oryndaıtyn kýrerdi (taksı júrgizýshisin) jeńildetilgen tártippen tirkeýdi ári salyqtyq mindettemelerin oryndaýyn kózdeıdi. Taksı júrgizýshileri úshin pılottyq basymdyqtary: taksı parkteriniń deldaldyq qyzmeti joıylady, bul aqsha qarajatyn únemdeýge jáne ony salyq jáne áleýmettik tólemderge tóleýge múmkindik beredi», - dep atap ótedi vedomstvodan.
Soǵan oraı júrgizýshi áleýmettik qamtamasyz etý júıesine tartylady, jeke kásipker retinde ońaı tirkeledi (salyq organyna barmaı-aq tirkelý), tapqan tabysynan 1 paıyz mólsherinde salyq tóleıdi, esep-qısap berý, salyq jáne áleýmettik tólemder aýdarý mindettemesi bolmaıdy.
Bul rette áleýmettik tólemder taksı júrgizýshisiniń tapqan tabys somasyna baılanysty aıqyndalady. Sonymen qatar pılottyq jobaǵa Glovo, Wolt, InDrive syndy kompanııalardy da tartý josparlanyp otyr.
