Taksı júrgizýshisi jaıaý júrginshini soǵyp mert qyldy -Aqmola oblysy
KÓKShETAÝ. QazAqparat - Aqmola oblysynda taksı júrgizýshisi jaıaý júrginshini «Lada Granta» kóligimen qaǵyp ketip mert qyldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń deregi boıynsha, oqıǵa 20-shy qyrkúıek kúni saǵat 14:45 shamasynda oblystaǵy aýdan ortalyqtarynyń birinde bolǵan. Tergeý amaldary kezinde anyqtalǵandaı, aýyldyń 59 jastaǵy turǵyny joldan júgirip ótpek bolǵan. Sol kezde, jaqyn kelip qalǵan kólik ony qaǵyp ketken.
«Jol-kólik oqıǵasynan zardap shekken áıel aýrýhanaǵa alyp bara jatqan kezde jedel járdem kóliginde kóz jumdy. «Lada Granta» kóliginiń júrgizýshisi buryn QR QK 293 babynyń 3 bóligi boıynsha sotty bolǵany jáne saraptama qorytyndysyna saı oqıǵa bolǵan kezde alkogoldik ishimdik ishpegeni anyqtaldy.
Qazirgi kezde, osy oqıǵaǵa baılanysty QR QK 345 babynyń 3 bóligi boıynsha is qozǵalyp, sotqa deıingi tergeý amaldary júrgizilýde. Oqıǵanyń mán-jaıy anyqtalý ústinde«, deıdi vedomstvodan.
