Taksı júrgizýshileri men kýrerler úshin salyqty kimder aýdarady
«Bul saladaǵy problemalardy sheshý úshin Áleýmettik kodeks jobasynda 3 baǵyt kózdelgen. Onyń birinshisi – eńbek naryǵyn lıberalızatsııalaý. Bul – ıkemdi jumyspen qamtylýdyń barlyq túrin, sonyń ishinde platformalyq jumysty tanýdy bildiredi. Osy maqsatta «táýelsiz jumysker», ıaǵnı tabys ákeletin eńbekpen aınalysatyn, biraq tıisti ýákiletti organdarda resmı memlekettik tirkeýi joq tulǵa uǵymy engizilgen bolatyn. Eger táýelsiz jumysker óz qyzmetin onlaın platformalar ofertasyna qosylý nemese jarııa shart jasasý arqyly atqaratyn bolsa, onda bul adamdar resmı jumyspen qamtyldy dep tanylady. Mysaly, ıAndeks taksı onlaın platformasyna qosylǵan taksı júrgizýshileri, Glovo onlaın platformasyna qosylǵan kýrerler osy sanattaǵy jumyskerler qataryna kirgiziledi», - dedi T. Dúısenova.
Onyń aıtýynsha, bul jumyskerler úshin onlaın platformasynyń opretorlary salyq agentteri bolyp qaralyp, arnaýly salyq rejımderine sáıkes, jumyskerlerdiń paıdasyna salyq tólemderi men áleýmettik jarnalardy aýdaryp otyratyn bolady.
«Bul jaǵdaıda táýelsiz jumyskerler jaldamaly jumyskerler sııaqty respýblıkalyq bıýdjetten, memlekettik áleýmettik qordan jáne saqtandyrý kompanııalarynan áleýmettik tólemder alýǵa quqyly bolady. Tıisti aýdarymdar bolmaǵan jaǵdaıda, olarǵa zańdarda belgilengen eń tómengi memlekettik kepildikter ǵana beriledi», - dedi vedomstvo basshysy.
Budan buryn habarlanǵandaı, onlaın platformalar arqyly (ıAndeks Taksı, ıAndeks GO jáne t.b.) jumyspen qamtylǵan azamattar úshin arnaıy salyq rejımi engiziledi.
Bul rette salyq agentteri rólinde onlaın platformalar operatorlaryn aıqyndaý usynylady. Olar osynda jumys isteıtin azamattar atynan tıisti tólemderdi júrgizedi.
