Taksı qyzmetin úılestirýge oraı zańdarǵa ózgerister engizý qajet
ASTANA. QazAqparat - Taksı qyzmetin úılestirýge oraı zańdarǵa ózgerister engizý qajet. Bul týraly búgin Astana qalalyq kásipkerlerdi qorǵaý keńesiniń 17-shi otyrysy aıasynda tilshilerge suhbat bergen keńes múshesi Zeınolla Alshymbaev aıtty.
«Elordada kásipkerlik óte jaqsy damyp kele jatyr deýge bolady. Astananyń ishki jalpy óniminiń 60 paıyzyn qazirgi ýaqytta shaǵyn jáne orta bıznes berýde. Al búgingi keńeste qalany kólik júıesimen qamtamasyz etý, taksı qyzmetin jolǵa qoıý máselesi qaralady», - dedi ol.
Onyń atap ótýinshe, qala turǵyndary men qonaqtaryna sapaly taksı qyzmetin kórsetý óte ózekti máselege aınalyp otyr.
«Mamandardyń esebine sáıkes elordaǵa 2 myńnan 3 myńǵa deıin taksı kólikteri qajet eken. Al elordada jolaýshylardy resmı tasymaldaý quqyǵyna ıe 8 kásiporynda nebári 400-ge jýyq qana kólik bar. Al, qalǵanyn jeke kóligi bar barlyq júrgizýshiler tolyqtyryp otyr», - dedi Z.Alshymbaev.
Keńes múshesiniń atap ótýinshe, búgingi keńestiń qorytyndysy boıynsha taksı qyzmetin úılestirýge qatysty zańǵa ózgerister engizý ázirlenýi yqtımal. Óıtkeni, taksı qyzmeti erejesi men elimizdiń zańnamasy arasynda qarama-qaıshylyqtar bar.
«Ásirese, jolaýshylardy tasymaldaý qyzmetin kórsetetin kompanııalardyń qyzmetin bastaý máselesi zańda bir sıpatta aıtylsa, onyń erejeleri mınıstrlikterde, ókiletti organdarda qabyldanǵanda basqa sıpatqa ıe bolyp turady. Osyny joıýymyz kerek. Buǵan qosa, taksı qyzmetin shaqyrǵan kezde onyń kelý ýaqyty 10 mınýttan aspaýy tıis. Ekinshiden, ony paıdalýshylar óz qaýipsizdigine alańdamaýy qajet»,- dep atap ótti ol.
