Taksı quny úsh esege jýyq ósti: Básekelestikti qorǵaý agenttigi inDrive servısine eskertý jasady
ASTANA. KAZINFORM – Básekelestikti qorǵaý jáne damytý agenttigi inDrive servısine básekelestikti qorǵaý salasyndaǵy zańnamanyń buzylýyna jáne tutynýshylardyń quqyqtarynyń shektelýine ákelýi múmkin áreketterge jol bermeý týraly aldyn ala eskertý joldady.
Buǵan 2026 jylǵy 11 qazanda «ıAndeks Go» servısiniń ýaqytsha qoljetimsiz bolýyna baılanysty jol júrý qunynyń edáýir óskeni týraly buqaralyq aqparat quraldarynda jarııalanǵan habarlamalar negiz boldy.
Paıdalanýshylardyń taksı shaqyrýǵa arnalǵan balama platformalarǵa jappaı aýysýy nátıjesinde inDrive qyzmetine suranys aıtarlyqtaı artty. BAQ málimetinshe, jekelegen jaǵdaılarda sapar quny úsh esege jýyq ósken.
— inDrive servısiniń jumys isteý ereksheligin eskere otyryp, sapar quny jolaýshy men júrgizýshi arasyndaǵy kelisim boıynsha belgilenedi. Bos avtokólikterdiń tapshylyǵy júrgizýshiler usynatyn tarıfterdiń edáýir ósýine alyp keldi.
inDrive kompanııasynyń BAQ-ta taratqan aqparatyna sáıkes, jaǵdaıdy turaqtandyrý maqsatynda servıs komıssııany mindetti salyqtardy jabýǵa jetkilikti eń tómengi deńgeıge deıin tómendetip, sondaı-aq baǵa boıynsha saýdalasýdyń shekti aýqymyna qatysty shekteýler engizgen, — delingen habarlamada.
Sonymen qatar agenttik Qazaqstandaǵy taksı agregatorlary naryǵynyń joǵary shoǵyrlaný deńgeıimen sıpattalatynyn atap ótti. Mundaı jaǵdaıda qyzmetterdiń qoljetimdiligin qamtamasyz etý jáne sapar qunynyń negizsiz ósýine jol bermeý tutynýshylardyń múddelerin qorǵaý úshin erekshe mańyzǵa ıe.
Halyqaralyq tájirıbede tótenshe jaǵdaılar men ózge de kútpegen mán-jaılar kezinde tarıfterdiń kúrt ósýin tejeý tetikteri qoldanylady.
Qazaqstan Respýblıkasy Kásipkerlik kodeksiniń 174-babyna sáıkes, tutynýshylardyń aıqyndalmaǵan tobynyń zańdy quqyqtaryna nuqsan keltiretin naryq sýbektileriniń áreketterinde básekelestikti qorǵaý salasyndaǵy zańnamany buzý belgileri bolýy múmkin.
Osyǵan baılanysty agenttik Kásipkerlik kodekstiń 198-babynyń 1-tarmaǵyna sáıkes, monopolııaǵa qarsy zańnamanyń buzylýyna ákelýi múmkin áreketterge jol bermeý týraly jazbasha aldyn ala eskertý joldady.
Agenttik bul eskertýdiń aldyn alý sıpatynda ekenin jáne onyń yqtımal quqyq buzýdyń aldyn alýǵa, tutynýshylardyń quqyqtaryn qorǵaýǵa ári taksı agregatorlary qyzmetteri naryǵynda adal básekelestikti qamtamasyz etýge baǵyttalǵanyn atap ótedi.
Aıta ketelik Qazaqstanda Yandex Go servısteriniń jumysy toqtaǵan edi. Sonymen qatar Jaslan Mádıev ıAndekstegi aqaýlar jóninde pikir bildirgen edi.
