«Taqııaly perishteniń» aıtylmaǵan ańyzy (FOTO)
ASTANA. QazAqparat - Uly kınematograf Sháken Aımanovtyń «Taqııaly perishte» fılmi jarty ǵasyrdaı kórermenderdiń kózaıymyna aınalǵan kórkem týyndyǵa aınaldy. Búgingi kúnge deıin teńdesi joq komedııanyń sátti shyǵýynyń syry nede? Ol týraly tolyǵyraq «Qazaqstan» telearnasyndaǵy «Senbilik kezdesý» baǵdarlamasynan búgin, senbi keshki 21-00-de tamashalaı alasyzdar, dep habarlady «Ulttyq arnanyń» baspasóz qyzmetinen.
Ańyzǵa aınalǵan fılmniń basty keıipkerleri búgingi kúni nemen aınalysady? Bas keıipkerlerdi somdaǵan Álimǵazy Raıymbekov pen satýshy-qyz Aıshanyń (shyn esimi - Sholpan) kınodaǵy mahabbattary shynaıy ómirde jalǵasyn tapty ma, frantsýz tiliniń ustazy kınodan nege aıaqasty ketip qaldy? Túsirilim alańynan birneshe ret ketýge oqtalǵan A.Raıymbekovty Sh.Aımanov qalaı toqtata aldy? Ańyzǵa aınalǵan taqııa búgingi kúni qaıda saqtalǵan? 28 jastaǵy geografııa pániniń muǵalimi Taılaqtyń rólin somdaǵan Álimǵazy aǵa búgin nemen aınalysady? 10 balanyń ákesi, 20 shóbere súıip otyrǵan aqsaqaldyń búgingi armany qandaı? Balalarynyń biri bolsa da nege akter jolyn qýmady, nemereleri atamyz «taqııaly perishte» Taılaq dep maqtana ma?
««Senbilik kezdesý» baǵdarlamasyna fılmniń túsirilimine qatysqan basqa da kútpegen qonaqtar keledi. Eń basty jańalyq: «Taqııaly perishte» týyndysynyń ekinshi bólimin túsirýge daıyndyq júrgizilýde. Baǵdarlamaǵa jetispeı turǵany - aıaýly Ámına Ómirzaqova apamyzdyń kúlkisi ǵana», delingen habarlamada.
