«Taqııaly perishte» astanalyq sahnada qaıta jandanady
ASTANA. 13 maýsym. QazAqparat - Bastama avtorlary tanymal fılmdi kontserttik sahnaǵa qoıý qajet dep sheshti.
Súrboıdaq Taılaq (Rasýl Nógerbekov) pen oǵan jar izdegen anasynyń (Aıjan Salaeva) qyzyqty sátterin astanalyqtar Astana kúniniń 14-jyldyq merekesi kezinde tamashalaı alady, dep habarlaıdy www.astanaday.kz saıty.
Kórnekti rejısser Sh.Aımanovtyń «Taqııaly perishte» komedııasy alǵash ret 1968 jyly ekranǵa jol tartqany esimizde. Sodan beri jarty ǵasyr ótse de, fılm áli kúnge ózektiligin joıǵan joq. Ondaǵy basty keıipkerlerdiń keı sózderin áli kúnge deıin sóz arasynda keltiretinder kóp.
«Taqııaly perishte» - bul tek qana ezý tartqyzar komedııa emes, ol ári ásem mýzyka. Fılmniń sahnalanǵan nusqasynda sımfonııalyq orkestr, Kameralyq hor ártisteri, «Shalqyma» ulttyq bı ansambliniń ónerleri pash etilmek. Odısseı jaıly án men yrǵaqty bı kórermendi erekshe áserlendireri sózsiz. Ana týraly (Bıbigúl Januzaq), Almaty týraly ánder (Nurbol Balapanov) men basqa da kompozıtsııalar jandy daýysta oryndalǵandyqtan, kópshilikti tamasha kóńil-kúıge bólemek.
