Takır Balyqbaev Halyqaralyq bıznes akademııasy rektorynyń qyzmetin atqarýshy bolyp taǵaıyndaldy
ALMATY. 15 qańtar. QazAqparat - Búgin Almatydaǵy halyqaralyq bıznes akademııasynda jańa rektor óz qyzmetine kiristi. Buǵan deıin rektor-prezıdent qyzmetin atqaryp kelgen Asylbek Qojahmetov endi prezıdent laýazymyn ǵana atqarady. Pedagogıka ǵylymynyń doktory, professor Takır Ospanuly Balyqbaev keshe buıryq boıynsha rektor qyzmetin atqarýshy bolyp taǵaıyndaldy. Onyń kandıdatýrasy akademııanyń Qamqorshylar keńesiniń májilisinda maquldandy.
Qazirgi ál-Farabı atyndaǵy Qazaq ulttyq ýnıversıteti matematıka fakýltetiniń túlegi T. Ospanuly 1986 jyly M. Lomonosov atyndaǵy Máskeý memlekettik ýnıversıtetinde fızıka-matematıka ǵylymdary kandıdaty, al 2003 jyly pedagogıka ǵylymdary doktory dıssertatsııasyn qorǵaǵan bolatyn. 2011 jyldyń tamyz aıynan beri Qazaq tehnologııa jáne bıznes ýnıversıteti rektory bolyp jumys jasady. Oǵan deıin Qazaq ulttyq agrarlyq ýnıversıtetiniń prorektory, QR Bilim jáne ǵylym mınıstrliginiń Memlekettik bilim standarttary jáne testileý ulttyq ortalyǵynyń dırektory, Bilim jáne ǵylym salasyndaǵy qadaǵalaý jáne attestattaý komıtetiniń tóraǵasy, Y. Altynsarın atyndaǵy Qazaq bilim akademııasynyń prezıdenti, Pavlodar memlekettik pedagogıkalyq ýnıversıteti rektorynyń mindetin atqarýshy sııaqty túrli qyzmetter atqardy. 140-tan astam monografııalardyń, oqý quraldary men maqalalardyń avtory. Onyń ǵylymı jetekshiligimen 8 kandıdattyq, 4 doktorlyq dıssertatsııa qorǵalǵan.
