Takır Balyqbaev: Basymyzǵa túsken synaqtarǵa baısaldylyq pen tabandylyq tanytýymyz kerek

NUR-SULTAN. QazAqparat – Abaı atyndaǵy Qazaq ulttyq pedagogıkalyq ýnıversıtetiniń rektory, pedagogıka ǵylymdarynyń doktory, ǵalym Takır Balyqbaev Memleket basshysy Qasym-Jomart Toqaevtyń elimizde qalyptasqan ahýalǵa baılanysty jarııalaǵan úndeýine qatysty pikir bildirdi, dep habarlaıdy QazAqparat tilshisi.

«Prezıdent jaǵdaıdy turaqtandyrýdyń alǵashqy belgileri bar ekenin atap ótti. Aldaǵy eki apta bizdiń bolashaq qadamdarymyz úshin sheshýshi bolatyny anyq. Memleket barlyq qajetti sharalardy qabyldaýda jáne bul sheshimder sózsiz durys. Qasym-Jomart Toqaev 13 shilde Qazaqstanda pandemııa qurbandaryn Ulttyq aza tutý kúni dep jarııalady. Bul - óte mańyzdy sheshim, qurbandardy eske alyp, aza tutý - halqymyzdyń dástúri jáne ómir jalǵasýynyń belgisi», - dep jazdy rektor Facebook paraqshasyna.

Takır Balyqbaevtyń jazýynsha, bul aýrýmen kúrestiń aldyńǵy qatarynda turǵan dárigerler ómirdi saqtaý úshin qoldan kelgenniń bárin jasap jatyr.

«Qabyldanǵan sharalar men medıtsınalyq qyzmetkerlerdiń erliginiń arqasynda jazylyp shyqqan adamdar sany aıtarlyqtaı ósti. Alaıda bul indet áli de jalǵasýda. Sondyqtan barlyq azamattardy karantın erejelerin qatań saqtaýǵa shaqyramyn: indetke qarsy kúrestiń tıimdiligi, eń aldymen, barlyq adamdardyń sanaly áreketteri men jaýapkershiligine baılanysty. Barlyq shekteýler men erejelerdi qatań oryndaý tek Sizdiń ǵana emes, jaqyn týystaryńyz ben dostaryńyzdyń ómirin saqtap qalatynyn este ustańyzdar. Biz bul kezeńde basymyzǵa túsken synaqtarǵa baısaldylyq pen tabandylyq tanytýymyz kerek», - dep túıdi Takır Balyqbaev.

Eske sala ketsek, búgin Memleket basshysy Qasym-Jomart Toqaev respýblıkalyq telearnalar arqyly elimizde qalyptasqan ahýalǵa baılanysty úndeý jarııalaǵan bolatyn. Prezıdent otandastarymyzdy halqymyzdyń basyna túsken synaq aldynda qaısarlyqqa, sabyr men jaýapkershilikke shaqyrdy.