Takata qaýipsizdik jastyǵyndaǵy aqaý úshin $1 mlrd aıyppul tóleıdi
ASTANA. QazAqparat - Japonııalyq Takata kompanııasy avtokólikke aqaýly qaýipsizdik jastyǵyn ornatqanyn moıyndady. The Wall Street Journal habarlaýynsha, óndirýshi shaǵymdardy rettep, tergeýdi toqtatý úshin AQSh qazynashylyǵyna $1 mlrd kóleminde aıyppul tóleıdi.
Basylymnyń habarlaýynsha, aıyppuldyń $25 mln ǵana AQSh úkimetiniń shotyna ketedi. $850 mln jýyq qarajat Takata qaýipsizdik jastyǵyn ornatqan avtokólik óndirýshilerdiń shyǵynyn óteýge jumsalady. $125 mln zardap shekken aqaýly kólik ıelerine jáne opat bolǵandardyń týystaryna ótemaqy retinde beriledi.
Takata qaýipsizdik jastyqtary jónindegi daý-damaı 2014 jyly bastaldy. Jastyq aqaýynan álem boıynsha 16 adam kóz jumyp, taǵy 180 adam jaraqat alǵan.
