Taılandtyń eks-premerine qatysty sot protsesi qaıta bastaldy
ASTANA. QazAqparat - Taıland Joǵarǵy soty seısenbi kúni burynǵy premer-mınıstr Taksın Chınavatqa qatysty sybaılas jemqorlyq isin qaraýdy bastady jáne ony aıyptaý tyńdalymyna kelmegendikten, qamaýǵa alýǵa order berdi, dep habarlaıdy Sınhýa agenttigi.
Taıland Bas prokýrory ótken jyldyń mamyr aıynda T. Chınavattyń telekommýnıkatsııa kompanııasyndaǵy sybaılas jemqorlyq jónindegi, 2008 jylǵy shildede qozǵalǵan is boıynsha sot talqylaýyn jalǵastyrýdy usynǵan. 6 naýryzda toǵyz adamnan quralǵan sot alqasy osy istiń tyńdalymyn bastady.
Prokýratýra T. Chınavat memlekettik laýazymda bolǵan kezde telekommýnıkatsııa kompanııasynyń kommertsııalyq qyzmetine aralasty, salyq zańdylyǵyn ózgertý jáne mınıstrler kabınetiniń qaýlylaryn shyǵarý jolymen kompanııa tóleýi tıis salyqtardan bosatty dep sanaıdy. Sonyń saldarynan memleketke 66 mlrd bat (2,1 mlrd AQSh dollary) mólsherinde zalal keltirilgen.
T. Chınavat Taıland premer-mınıstri laýazymyn 2001-2006 jyldary atqarǵan. 2006 jylǵy qyrkúıekte bılik basynan ketken soń shetelge baryp panalaǵan bolatyn.
Foto ussiancouncil.ru
