Taılandtyń jetekshi ýnıversıteti alǵashqy Ortalyq Azııa zertteýleri bólimin ashpaq
ASTANA. KAZINFORM – Taıland astanasynda eldegi eń kóne ári jetekshi joǵary oqý orny – Koroldik Chýlalongkorn ýnıversıtetinde alǵash ret Ortalyq Azııa kúni ótti, dep habarlaıdy Kazinform menshikti tilshisi.
Sharany Qazaqstan Elshiligi Taıland Syrtqy ister mınıstrligimen birlesip uıymdastyrdy.
Negizgi oqıǵa ýnıversıtettiń jańa Ortalyq Azııataný kafedrasynyń ashylǵanyn jarııalaýy boldy.
Óner fakýltetiniń dekany, professor Sýradetch Chotıýdompanttyń aıtýynsha, bul bólim Taıland pen Ortalyq Azııa elderi arasyndaǵy akademııalyq yntymaqtastyq, ǵylymı zertteý jáne mádenı almasý alańy bolady.
Taıland SІM Erekshe tapsyrmalar jónindegi Elshisi Pongprach Makchan Taıland delegatsııasynyń Qazaqstanǵa maqsatty saparyna daıyndyq barysy týraly habarlady, onyń aıasynda ýnıversıtetter men memlekettik organdardyń ókilderimen kezdesýler josparlanǵan.
Festıvalde Qazaqstan, Qyrǵyzstan, Tájikstan, Túrikmenstan jáne Ózbekstannyń ulttyq pavılondary jumys istedi. Qazaqstan eki pavılon usyndy: birinshisi qonaqtardy mádenı muramen, dástúrli kádesyılarmen jáne kúndelikti turmystyq zattarmen tanystyrsa, ekinshisinde eldiń týrıstik áleýeti men saıahattyń jańa múmkindikteri tanystyryldy.
Sharaǵa kelgen qonaqtar qazaq halqynyń mádenıeti men salt-dástúrleri týraly kóbirek bilýge jáne ulttyq taǵamdardy tańdaýǵa múmkindik aldy. Kontserttik baǵdarlamada jergilikti halyq ansambliniń oryndaýynda qazaqtyń «Aqqý», «Arýlar», «Qoshbazar» bıleri oryndaldy.
Ortalyq Azııa kúni 300-ge jýyq qatysýshyny, onyń ishinde dıplomattar, Taılandtyń memlekettik organdarynyń ókilderi, ǵylymı jáne isker toptar men qalyń jurtshylyqty biriktirdi.
Uıymdastyrýshylar atap ótkendeı, mundaı sharany ótkizý mádenı baılanystardy nyǵaıtý, ǵylymı jáne bilim berý jobalaryn damytý, gýmanıtarlyq jáne týrıstik yntymaqtastyqty ilgeriletý, Taılandta Qazaqstannyń jáne búkil Ortalyq Azııa aımaǵynyń oń ımıdjin ilgeriletýdiń mańyzdy alańyna aınalǵan.
Buǵan deıin Taıland bıligi Bangkokta qutyrma indetiniń taralýy týraly eskertkenin jazǵan bolatynbyz.