Taılandtyń ońtústiginde sý tasqyny saldarynan júzdegen týrıst evakýatsııalandy
ASTANA. KAZINFORM — Taıland bıligi Songhla provıntsııasynyń aýdandarynda nóser jańbyrlarǵa baılanysty Hatıaı qalasyndaǵy sý basqan qonaq úılerden 400-den astam týrısti evakýatsııalady, dep habarlaıdy Kazinform.
Bangkoktyq Khaosod English basylymynyń habarlaýynsha, Týrızm jáne sport mınıstri Sýdevan Vangsýphakchıkosol 24 qarashada vedomstvonyń elshilikter, qonaqúı ıelerimen jáne jergilikti bılikpen birlesip sý tasqynynan zardap shekken saıahatshylardy taýyp, olardy qaýipsiz aımaqtarǵa kóshirý úshin jumys istep jatqanyn málimdedi.
Onyń aıtýynsha, Irrıgatsııa departamenti sheteldik jáne taı týrısterin sý basqan aımaqtardan ýaqytsha baspanalarǵa tasymaldaý úshin úlken júk kólikterin jiberip, olardy sý jáne tamaqpen qamtamasyz etken.
Bılik málimetinshe, jeksenbi kúni 17 qonaqúıden 402 týrıst Hatıaı mýnıtsıpalıtetindegi qabyldaý ortalyqtaryna jetkizildi, al keıbireýleri keıinirek qalalyq avtovokzalǵa jiberildi. Malaızııalyq týrıster avtobýstarǵa miný úshin Sadao baqylaý-ótkizý beketine deıin shyǵaryldy.
Sheneýnikter Sıngapýr elshiligine, sondaı-aq Malaızııa men Indonezııa konsýldyqtaryna jaǵdaı men qutqarý jumystarynyń barysy týraly habarlaǵanyn málimdedi.
Taılandt ońtústiginiń aýa raıy jáne tabıǵı kataklızmder jónindegi sarapshy doktor Somporn Chýaıarı BBC Thai arnasyna Hatıaıdaǵy bıylǵy eń qatty sý tasqyny aımaqtyń ústinen tikeleı ótetin tropıkalyq front boıyndaǵy qalyptan tys qatty jańbyrdan bolǵanyn aıtty.
Eske sala ketsek, Albanııaǵa jaýǵan nóser jańbyr men bolǵan sý tasqyny saldarynan Grekııamen shektesetin Devole aýdanynda bir áıel qaza tapty.