Taılandtan táttiler arasynda 4,7 keli esirtki alyp kelgen boıjetken sottaldy
ASTANA. KAZINFORM — Astanada Taılandtan Qazaqstanǵa esirtki jetkizgen eki adam uzaq merzimge bas bostandyǵynan aıyryldy. Biri 4,7 keli kannabıs ekstraktyn táttiler retinde alyp ótpek bolsa, ekinshisi esirtkini poshta arqyly jiberýdi uıymdastyrǵan.
Bas kólik prokýratýrasynyń málimetinshe, birinshi is boıynsha 20 jastaǵy boıjetken aqshalaı syıaqy úshin Taılandtan esirtki salynǵan eki shabadandy jetkizgen. Jalpy salmaǵy 4,7 keli kannabıs ekstrakty táttiler retinde jasyrylǵan. Alaıda zańsyz júk onyń Astana áýejaıyna ushyp kelgen boıda anyqtalyp, tárkilendi.
Sot boıjetkendi 16 jylǵa bas bostandyǵynan aıyrdy.
Ekinshi is boıynsha 39 jastaǵy er adam 2024 jyldyń kókteminde Taılandtan Qazaqstanǵa esirtkini halyq tutynatyn taýarlar retinde jasyryp, poshta arqyly jiberýdi uıymdastyrǵan.
Bul sálemdemeni alýǵa tıis úsh adam buǵan deıin sottalǵan. Esirtkini jibergen er adamǵa izdeý jarııalanyp, keıin ustalǵan soń sot aldynda jaýap berdi. Ol 8 jylǵa bas bostandyǵynan aıyryldy.
Eki is boıynsha da memlekettik aıyptaýdy kólik prokýratýrasy qoldady. Úkimder áli zańdy kúshine engen joq.
Eske salaıyq, buǵan deıin Astanada Telegram arqyly esirtki satqan top músheleri sottalǵanyn habarlaǵan edik.
