Taılandtan poshtamen marıhýana aldyrǵan astanalyq jasóspirim sottaldy

ASTANA. KAZINFORM – Elordada kolledj stýdenti Telegram messendjeri arqyly Taılandtan keptirilgen marıhýana (998 gramm) aldyryp satpaq bolǵan.

Astana qalasynyń qylmystyq ister jónindegi mamandandyrylǵan aýdanaralyq sotynyń málimetinshe, sottalýshy, kámeletke tolmaǵan kolledj stýdenti B. Telegram messendjerindegi «V» akkaýntyn paıdalanýshymen kelisip, esirtki saqtaıtyn qoımaǵa jumysqa turǵan. 

Akkaýnt paıdalanýshysy B.-nyń jeke derekterin paıdalana otyryp, Taıland koroldiginen halyqaralyq poshta arqyly Qazaqstan Respýblıkasyna 998 gramm keptirilgen marıhýanany jibergen. 2024 jylǵy 6 tamyzda B. «Qazposhta» AQ fılıalynan tapsyrysty, ıaǵnı esirtkini alǵan.

— B. esirtkini saqtaý, oraý jáne satý maqsatynda páter jaldaǵan. Sol kúni B.-nyń úıin tintý barysynda 998 g keptirilgen marıhýana tabylyp, tárkilendi. Sottalýshynyń kinási úıdi tintý hattamasymen, kýágerler men poshta qyzmetkerleriniń aıǵaqtarymen, saraptama qorytyndylarymen jáne Telegram akkaýntynyń paıdalanýshysymen hat almasý aqparattarymen dáleldendi, — delingen sottyń sheshiminde. 

Sottalýshy óz kinásin tolyq moıyndaǵan jáne prokýror 8 jyl merzimge bas bostandyǵynan aıyrý jazasyn surady. 

— Sot jaza taǵaıyndaý kezinde jasalǵan asa aýyr jáne aýyr qylmystyń sıpaty men qoǵamdyq qaýiptilik dárejesin eskerdi. Sot úkimimen B. Qylmystyq kodekstiń 297-baby 3-bóliginiń 1,5) tarmaqtarynda jáne Qylmystyq kodekstiń 28-babynyń 5-bóligi — 286-baby 2-bóliginiń 4, 5) tarmaqtarynda kózdelgen qylmystardy jasaǵany úshin kináli dep tanylyp, 8 jylǵa bas bostandyǵynan aıyryldy, — degen sot úkimi shyqty.

Úkim zańdy kúshine engen joq.

Eske sala ketsek, ótken jyly elimizde 22 tonna esirtki tárkilendi. 

Aıta keteıik, Almatyda «Narkostop» jobasynyń qorytyndysy boıynsha esirtkige táýeldilerdiń 44 paıyzy qyzyǵýshylyqtan qoldanady.