Taılandtan esirtki jetkizetin halyqaralyq arnanyń joly kesildi

ASTANA. KAZINFORM - Astana qalasy prokýratýrasynyń bastamasymen «Zań jáne Tártip» tujyrymdamasy sheńberinde esirtki kontrabandasyna qarsy keshendi aldyn alý sharalary ázirlenip, júzege asyrylýda, dep habarlaıdy elorda prokýraýrasynyń baspasóz qyzmeti.

Polıtsııa departamenti men logıstıkalyq kompanııalardyń birikken jumysynyń nátıjesinde poshta jóneltilimderin tekserý úshin qyzmettik-izdestirý ıtterin paıdalanýdy qarastyratyn is-sharalar jospary bekitildi.

Esirtki kontrabandasynyń tórt faktisi anyqtaldy.

Mysaly, Almaty qalasynan jetkizilgen 4,9 kg mefedron tárkilendi. Sondaı-aq, Batys Avstralııadan úrlemeli matras retinde jetkizilgen 914 gr marıhýana kontrabandasy anyqtaldy. Bul boıynsha 4 adam ustaldy.

Budan bólek, Taılandtan esirtki jetkizýdiń zańsyz halyqaralyq arnasy toqtatyldy, onymen 998,43 gr keptirilgen marıhýana tárkilendi.

2024 jyldyń 22 qarashasynda Iran Islam Respýblıkasy azamatynyń páterinen tintý kezinde Ulybrıtanııadan poshta arqyly jiberilgen 151,20 gr keptirilgen marıhýana tárkilendi.

Barlyq faktiler boıynsha QR QK-niń 296 jáne 297-baptaryna sáıkes sotqa deıingi tergep-tekserý amaldary bastaldy.

Óz kezeginde, 6 esirtki taratýshy ustaldy, onyń ishinde 1 adam qylmystyq jaýapkershilikke tartylyp, 10 jylǵa bas bostandyǵynan aıyryldy. Qalǵandaryna qatysty tergeý áreketteri júrgizilýde.

«Astana qalasynyń prokýratýrasy quqyq qorǵaý organdary men memlekettik qyzmetterdiń zańdylyqty qamtamasyz etý jáne qoǵamdy esirtki qaýip-qaterinen qorǵaý boıynsha úılestirý jumysyn jalǵastyrýda»,-delingen habarlamada.

Osyǵan deıin Premer-Mınıstr esirtkige qarsy kúresti kúsheıtýdi tapsyrǵany týraly jazǵan bolatynbyz.