Taılandtan Almatyǵa ushqan «Scat» ushaǵy Shymkent áýejaıyna shuǵyl qondy
Ushaq tańǵy 10:00-da Almaty áýejaıyna qonýy tıis bolatyn. Elge kele jatqanda reıs Shymkenttegi zapastaǵy áýejaıǵa qonýǵa májbúr boldy. Sebebi, qalyń tuman bolǵan jaǵdaıda qonýǵa ushaq ekıpajynyń sertıfıkaty joq bolyp shyqty. Sıanǵa ushatyn 777 reısi de sol sebeppen bógeldi.
AirAstana áýe kompanııasynyń Astana men Frankfýrtqa ushatyn 3 reısi men «Scat» áýe kompanııasynyń Actanaǵa ushatyn bir reısi áýe kompanııalarynyń óndiristik qajettilikteri úshin ushpaıtyn boldy.
Odan bólek, 12:05-te ushýy tıis Almaty - Oral baǵytyndaǵy AirAstana kompanııasynyń 881 reısi 12:45-ke shegerildi. Bul reıske jospardan tys tehnıkalyq qyzmet kórsetý belgilendi. Sondaı-aq, 12:25-te ushýy tıis Almaty - Óskemen baǵytyndaǵy AirAstana 301 reısi 13.45-ke shegerildi. Óıtkeni, ushaq Shymkentten keshigip jetti.
Almaty áýejaıynyń baspasóz qyzmeti jolaýshylarǵa jolǵa shyqpas buryn áýejaıdyń anyqtama qyzmetine 270-33-33 nómiri boıynsha habarlasyp, anyqtap alý kerektigin eskertedi.
Búgin qalyń tuman kesirinen áýejaıda ondaǵan reıs keshikkenin habarlaǵan bolatynbyz. Áýejaıdyń baspasóz qyzmeti taratqan málimetke sáıkes, búgin tańerteń Almaty áýejaıy mańaıynda qalyń tuman tústi. Dál qazir áýejaıda kórinis 150/40 metr shamasynda. Alaıda, áýejaı shtattyq rejimde jumys jasap tur. IKAO ІІІ V sertıfıkaty bar ekıpajdar keste boıynsha ushyp-qonyp jatyr.
Aıta ketý kerek, Almaty áýejaıy byltyr qarasha aıynan bastap qalyń tuman jaılap, kórinis 75/0 bolsa da, ushaq qabyldaı alatyn múmkindikke ıe boldy. Ushý-qoný jolaǵyn qaıta jasaýǵa 8 mlrd teńge ınvestıtsııa jumsaldy. Alaıda, mundaı ekstremaldy jaǵdaıda qoný úshin ushaq ekıpajdarynyń da IKAO ІІІ V sertıfıkaty bolýy kerek. Ondaı sertıfıkaty joq ekıpajdar áýejaıǵa qona almaıdy.
Foto: zaleskiy.com