Taılandtaǵy týrnırde Tórehan Sabyrhan chempıon atandy

ASTANA. KAZINFORM — Taıland astanasy Bangkokta ótip jatqan bokstan Thailand Open halyqaralyq týrnırinde Tórehan Sabyrhan (70 keli) chempıon atandy.

Qazaqstandyq sportshy fınalda ózbekstandyq Mýhammadazızbek Ismoılovty 5:0 esebimen aıqyn basymdyqpen jeńdi.

Aıta ketsek, Tórehan jastar jáne jasóspirimder arasynda tórt dúrkin Azııa chempıony ataǵyn jeńip alǵan.

Tórehan byltyr qarasha aıynda Chernogorııanyń Býdva qalasynda ótken jastar arasyndaǵy bokstan álem chempıonatynyń altyn medalin ıelendi.

Erler quramasynda endi Dıas Moljigitov (80 keli) chempıondyq ataqqa talasady.

Al áıelderde Vıktorııa Grafeeva (60 keli), Natalıa Bogdanova (70 keli), Nadejda Rıabets (75 keli), Gúlsaıa Erjan (80 keli) jáne Eldana Tálipova (80 keliden joǵary) sharshy alańǵa shyǵady.

Sondaı-aq el quramasynan Dýlat Bekbaýov (65 keli), Danııar Rahymberdıev (90 keli), Bekzat Tańatar (85 keli) men Nursultan Altynbek (55 keli) qola júldeni qanaǵat tutty.

Dástúrli týrnır 24 mamyr men 1 maýsym aralyǵynda ótkizilip jatyr. Oǵan Qytaı, Koreıa, Japonııa, Ózbekstan, Qazaqstan, Taıland jáne taǵy basqa eldiń bylǵary qolǵap sheberleri qatysady dep josparlanǵan.