Eldos Smetov pen Ábıba Ábýjaqynova Azııa chempıonatyna qatyspaıdy

ASTANA. KAZINFORM - Dzıýdodan 2024 jylǵy Olımpıada chempıony Eldos Smetov 25-28 sáýir kúnderi Taıland astanasy Bangkokta ótetin Azııa chempıonatyna qatyspaıdy.

Bul jóninde dzıýdodan Qazaqstan ulttyq quramanyń jattyqtyrýshy-keńesshisi Robert Mshvıdobadze Kazinform tilshisine aıtty.

- Eldos Smetov Olımpıadadan keıin josparly qalpyna kelý kezeńinen ótip jatyr. Ol jattyǵý jumystaryna jáne oqý-jattyǵý jıynyna álem chempıonatynan keıin qosylady, - dedi ol.

Sondaı-aq Robert Mshvıdobadze ulttyq qurama tiziminde Ábıba Ábýjaqynovanyń nege joq ekenin túsindirdi.

- Al Ábıba Ábýjaqynova álem chempıonatyna daıyndyqqa kiristi. Atalǵan dúbirli doda bıylǵy maýsymdaǵy eń mańyzdy jarystyń biri retinde baǵalanady. Qazir Qazaqstan quramasynyń kóshbasshylaryn qosa alǵanda, barlyq jetekshi sportshy osy týrnırge josparly túrde daıyndalyp jatqanyn aıta ketkenimiz jón, - dedi ol.

Qurlyqtyq birinshilikte el namysyn 17 tatamı sheberi qorǵaıdy. Qazir ulttyq qurama Astana qalasynda oqý-jattyǵý jıynyn ótkizip jatyr.

2016 jylǵy álem chempıonatynyń qola júldegeri, 2017 jylǵy Azııa chempıony Erasyl Qajybaev bastaǵan erler quramasynda Nurádil Áljan (60 keli), Sherzod Davlatov (60 keli), Erjan Erenqaıypov (66 keli), Eset Qýanov (73 keli), Mádı Amangeldi (81 keli), Azat Kúmisbaı (81 keli) jáne Ermahan Ánýarbekov (90 keli), Maksım Meıirlan (90 keli) bar.

Al áıelder quramasynda segiz balýanǵa senim artamyz. Olardyń qatarynda 2024 jylǵy Azııa chempıonatynyń qola júldegeri Ǵalııa Tynbaeva (48 keli) jáne Dıana Býrkeeva (48 keli), Tolǵanaı Ábeýova (52 keli), Baqyt Qusaqbaeva (57 keli), Esmıgúl Kýıýlova (63 keli), Krıstına Sotnıkova (70 keli), Nazgúl Maratova (78 keliden joǵary), Aqerke Ramazanova (78 keliden joǵary) tatamı tórinde taıtalasqa túsedi.

Qosalqy quramǵa Talǵat Orynbasar (60 keli), Erdáýlet Bozsha (66 keli), Baqytjan Abdýrahmanov (73 keli), Marat Baıqamurov (100 keliden joǵary) iriktelip alynǵan.

Azııa chempıonatyna 30 elden 300 dzıýdoshy qatysady dep josparlanǵan.

Qazirge deıin Qazaqstan ulttyq quramasy qurlyqtyq dodada barlyǵy 115 medal enshiledi. Olardyń 14-i altyn, 24-i kúmis, 77-i qola medal.

Eske salsaq, 13-15 mamyr aralyǵynda Astanada alǵash ret para dzıýdodan álem chempıonaty ótedi.