Taılandta júk kóligi men avtobýs soqtyǵysyp, 8 adam qaza tapty
BANGKOK. Pattaııaǵa Densaýlyq saqtaý salasyndaǵy volonterlerdi tasymaldaǵan eki qabatty avtobýs Taılandtyq Nahonratchasıma soltústik-shyǵys provıntsııasynda tirkemesi bar júk kóligimen soqtyǵysqan, dep habarlaıdy QazAqparat.
Thai Rath gazetiniń jazýynsha, apat saldarynan segiz adam qaza taýyp, 40 adam túrli jaraqat alǵan.
Avtobýsta Chonbýrı provıntsııasyna Pattaııaǵa tanysý saparyna jiberilgen 47 erikti bolǵan. Barlyq zardap shekkender jaqyn mańdaǵy aýrýhanalarǵa jatqyzyldy.
Apattan aman qalǵandardyń biri tártip saqshylaryna avtobýstyń tez júrgenin, jolaýshylardyń uıyqtaı almaǵanyn aıtty. Olar tipti júrgizýshi rýlde qalǵyp kete bergendikten toqtap, demalyp alýyn ótingen. Júrgizýshi munyń múmkin emestigin aıtqan. Óıtkeni ol Pattaııaǵa birge barǵan basqa eki avtobýstyń júrgizýshilerimen kezdesýge kelisken kórinedi.
Júk kóligi baǵdarshamnyń ruqsat etilgen sıgnalyna ótip bara jatqanda, avtobýs onyń búıirine soǵyp, eki kólik te aýdarylyp ketken.
