Taılandta jarylystardy daıyndaýǵa qatysqan alty kúdikti ustaldy
ASTANA. QazAqparat - Sársenbi kúni Taıland áskerı bıligi qazan aıynyń aıaǵynda Bangkok pen Sývannaphým halyqaralyq áýejaıynd jarylys jasaýdy josparlaǵan alty kúdiktini polıtsııaǵa tapsyrdy, dep habarlady Bangkok Post gazetiniń ınternet-nusqasy.
Jergilikti BAQ-tyń jazýynsha, jarylysqa daıyndyq týraly Taılandqa Avstralııa arnaıy qyzmeti habarlaǵan. Aqparat kelip túsken sátten polıtsııa men áskerıler Bangkoktyń túrli aýdandarynan kúdiktilerdi izdeý jónindegi aýqymdy operatsııany bastap ketti. Nátıjesinde, eldiń «qıyr ońtústigindegi» musylman provıntsııalarynyń úsh turǵyny ustaldy. Ol aımaqta 2004 jyldan beri jergilikti ıslam sodyrlary men taılandtyq qarýly kúshter arasynda qarýly qaqtyǵystar júrip jatyr.
RIA Novostıdiń habarlaýynsha, tergeý barysynda ustalǵan alǵashqy úsh kúdikti sybaılastarynyń esimin ataǵan. 6 jeltoqsan kúni Bangkok qylmystyq soty aldyńǵy úsh kúdiktini qosqanda, 14 adamdy qamaýǵa alý týraly qaýly shyǵardy.
Sársenbi kúni Bangkokta polıtsııaǵa tapsyrylǵan alty kúdikti izdeýde bolǵan jáne berilgen qaýlyǵa sáıkes ustaldy, dep jazdy gazet. Basylym kúdiktilerdi qashan jáne qaıda ustaǵanyn habarlaǵan joq. Taıland zańy boıynsha, áskerı bılikte aldyn ala tergeý júrgizý úshin azamattardy 7 kún boıy ustaý quqyǵy bar jáne tergeýden soń olardy polıtsııaǵa berýge mindetti.
Alty kúdiktiniń beseýi - «qıyr ońtústik» provıntsııalarynyń týmalary, bireýi - Bangkok turǵyny, delingen Bangkok Post maqalasynda.
