Taılandta jabaıy pilderge kontratseptıvtik vaktsına egile bastady

ASTANA. KAZINFORM — Taılandta adamdar men janýarlar arasyndaǵy qaqtyǵystar jıilegen óńirlerde jabaıy pilderge kontratseptıvtik vaktsına egip jatyr, dep habarlaıdy Kyodo..

Jaǵdaıdyń ýshyǵýy fermerlik sharýashylyqtardyń orman alqaptaryna qaraı keńeıýimen jáne pilderdiń tirshilik etý aýmaǵynyń qysqarýymen baılanysty, sonyń saldarynan olar eldi mekenderge jaqyndaı túsken.

Resmı derekterge sáıkes, ótken jyly jabaıy pilder 30 adamdy mert qylyp, taǵy 29 adamdy jaralaǵan. Egistik alqaptaryn joıýdyń eki myńnan astam jaǵdaıy tirkelgen.

Jabaıy tabıǵatty qorǵaý basqarmasynyń basshysy Sýkhı Býnsang Associated Press agenttigine bergen suhbatynda turǵyn aımaqtarǵa jaqyn mańdaǵy pilder sanynyń artýyna baılanysty olardyń sanyn retteý qajettigi týyndaǵanyn aıtty. Vedomstvo AQSh-ta óndirilgen vaktsınanyń 25 dozasyn alǵan jáne buǵan deıin jeti úı piline eki jyldyq synaq júrgizgen. Qoldanylǵan jeti doza oń nátıje bergen. Preparat ovýlıatsııany toqtatpaıdy, biraq uryqtanýǵa jol bermeıdi.

Qańtar aıynyń sońynda vaktsına Trat provıntsııasynda úsh jabaıy pilge egildi. Qazirgi ýaqytta qalǵan dozalardy qoldaný úshin jańa aýmaqtar anyqtalyp jatyr. Preparattyń áseri jeti jylǵa deıin saqtalady; sodan keıin janýar qaıtadan kóbeıýge qabiletti bolady. Vaktsına salynǵan pilderdiń jaǵdaıy preparat áser etetin búkil kezeń boıy baqylaýda bolady.

Baǵdarlama tabıǵatty qorǵaýshylar tarapynan synǵa ushyrady, óıtkeni olar pilderdiń bul túriniń jalpy sany azaıýy múmkin dep alańdap otyr. Pilder Taılandtyń tarıhy men mádenıetinde erekshe oryn alady jáne resmı túrde ulttyq nyshan bolyp sanalady.

Bılik ókilderi bul shara tek eń janjaldy aımaqtarda tirshilik etetin shamamen 4 400 pildiń 800-ine ǵana qatysty ekenin atap ótti. Bul óńirlerde popýlıatsııanyń jyl saıynǵy ósimi 8,2%-ǵa jetedi — bul el boıynsha ortasha kórsetkishten (shamamen 3,5%) eki eseden astam joǵary.

Sonymen qatar, ormandarda sýattar men qorektený alańdaryn jasaý, qorǵanys qorshaýlaryn salý, janýarlardy eldi mekenderden qaıtadan jabaıy ortaǵa qaıtarýmen aınalysatyn reındjerlerdiń jumysy sııaqty qosymsha sharalar da júzege asyrylyp jatqan kórinedi.

Aqpan aıynyń basynda Khonken provıntsııasynda sot sheshimimen pilder tobyn kóshirý qoǵamdyq rezonans týǵyzdy: bir janýar qaza tapty. Resmı tulǵalar aldyn ala saraptama nátıjesine sáıkes, pil kóshirý aldynda anestezııa engizilgennen keıin tunshyǵýdan ólgenin habarlady.

Ulttyq parkter, jabaıy tabıǵat jáne ósimdikter departamentiniń bas dırektory Atapol Charoenshýnsa oqıǵaǵa baılanysty ókinish bildirip, sonymen birge hattamanyń tıisti túrde saqtalǵanyn aıtty. Onyń sózinshe, bolashaqta mundaı jaǵdaılardyń aldyn alý úshin tergeý júrgizilip jatyr.

Buǵan deıin Taılandta sý tasqynynan pilderdiń qyrylǵanyn jazǵan edik.