Taılandta zardap shekken Qazaqstan azamaty búgin túnde Astanaǵa jetkiziledi
ASTANA. 18 jeltoqsan. QazAqparat - Keshe, jeltoqsannyń 17-inde Respýblıkalyq sanıtarlyq avıatsııa ortalyǵynyń jedel brıgadasy Farhat Muratbekovti elge jetkizý maqsatynda Taılandqa ushyp shyqty. Qazirgi ýaqytta qazaqstandyq dárigerler brıgadasy Pattaııa qalasynda jumys isteýde. Bul týraly QR Densaýlyq saqtaý mınıstrliginiń baspasóz qyzmetinen habarlandy.
«Naýqas F.Muratbekov 2013 jylǵy 13 jeltoqsannan beri Taılandtyń «Samitivej Sriracha Hospital» aýrýhanasynda jatyr. Sol jerde onyń jaǵdaıy tekserilip, Qazaqstanǵa jetkizýge daıyndyq jumystary júrgizilýde» delingen baspasóz baıanynda. Densaýlyq saqtaý mınıstrliginiń málimetine qaraǵanda, sanıtarlyq avıatsııa ushaǵy shamamen Astanaǵa búgin, 2013 jylǵy 18 jeltoqsanda saǵat 21.00-22.00 shamasynda kelip qonady. Al naýqasty elge jetkizýge ketetin shyǵyndy Qazaqstan Respýblıkasynyń Densaýlyq saqtaý mınıstrligi kótergen.
Eske sala keteıik, Farhat Muratbekov 2013 jylǵy 9 jeltoqsanda Taılandta qonaq úıdiń haýyzynda shomylyp júrgen kezinde zardap shekken bolatyn. Dárigerler onyń jaǵdaıyn óte aýyr dep baǵalaýda, ol tereń komada jatyr. Qazir ókpeni jasandy jeldetý júıesine qosylǵan. QR Densaýlyq saqtaý mınıstrligine Taıland Koroldigindegi QR Elshisi Marat Esenbaevtan respýblıka azamaty, 26 jasar Farhat Muratbekovtiń Pattaııada aýrýhanada aýyr halde jatqany týraly aqparat túsip, respýblıkanyń sanıtarlyq avıatsııasy arqyly elge jetkizý múmkindigi týraly másele qoıyldy. Toqtala ketetin jaıt, naýqastyń sheteldegi bir kúndik emi 10 myń AQSh dollaryna shyǵyp otyr. Medıtsınalyq saqtandyrý boıynsha bólingen qarajat tolyqtaı jaratylyp, týystarynyń da jeke qarajaty shekteýli bolǵandyqtan, naýqasty elge jetkizýge kómek berý týraly ótinishke oraı sheshim qabyldandy.
Toqtala ketetin jaıt, 2013 jyldyń 11 aıynda sanıtarlyq avıatsııa arqyly 1257 ushý atqarylyp, 1681 medıtsınalyq kómek kórsetilipti. 1071 naýqas respýblıkalyq jáne oblystyq emdeý uıymdaryna jetkizilip, 130 naýqasqa ota jasalǵan.
