Taılandta ıahtanyń jarylýy: zardap shekken qazaqstandyqtar oqıǵanyń mán-jaıyn aıtty
PHÝKET. KAZINFORM — Phýketten 9 shaqyrym jerdegi Maıton aralynda órtengen ıahtada bolǵan Qazaqstan azamaty Dýman Baıken osy oqıǵanyń mán-jaıyn aıtyp berdi.
- Dál qazir jaǵdaıymyz jaqsy. Órt bolǵan kezde men ıahtada boldym, al zaıybym (Baqytgúl Baıken) sýda júzip júrdi. Jalpy, ıahtada tehnıkalyq aqaý bar ekenin aldyn ala sezdik. Sebebi jolǵa shyqqan kezde, 10 mınýttan keıin benzın ısi sezilip, ıahtanyń bir qozǵaltqyshy isten shyqty. Ekinshi qozǵaltqyshymen áreń degende jaqynda turǵan aralǵa jettik… Ekıpaj músheleri qaıyqty jóndeýge kiristi. Al jolaýshylardyń keıbiri jaǵalaýda bolsa, keıbiri sýda boldy. Sol kezde men de ıahtanyń janynda sýda júzip júrgen edim. 20 mınýttan soń kıimimdi aýystyrý úshin ıahtaǵa kóterilip kele jatqanda jarylys boldy, - dedi D.Baıken Taılandtaǵy demalys úıinen onlaın rejımde Jibek Joly telearnasyna bergen suhbatynda.
Onyń aıtýynsha, órt kezinde ol sýǵa sekirip, áıelimen birge jaǵalaýǵa shyqqan. Jarylys saldarynan qoly kúıip qalǵan. Jarty saǵattan keıin týrısterdi qutqarýshylar alyp ketken. ıAhtada shamamen 37 adam bosa, onyń tórteýi - Qazaqstan azamaty.
- Bul jerde polıtsııa men aýrýhana qyzmetkerleri jaqsy qabyldap, kútim jasady, alǵashqy kómegin usyndy. Al volonterler bizge tez arada kıim jetkizip, tamaqtandyrdy. ıAhtada Qazaqstannan 4 adam boldyq, ekeýi Almatydan. Almatylyq jigittiń aıaǵyn kúıik shaldy, al qyzdyń shashy kúıip qaldy. Erteń gospıtalge taǵy baramyz. Osy eldegi Konsýl bizben baılanysqa shyqty, qazir biz ornalasqan qonaq úıge keledi, - dedi Dýman Baıken.
Onyń sózine qaraǵanda, ıahtadaǵy zattary men qujattary órtenip ketken. Konsýldyq qujattardy daıarlaýǵa kómektesedi.
- Biz osynda 30 naýryzda keldik. Demalysymyz 7 sáýirge deıin josparlanǵan, - dedi ol.
Buǵan deıin Taılandta qazaqstandyqtar mingen ıahta jarylǵanyn jazǵan edik.