Taılandta úńgirde qalyp qoıǵan tórt bala jerdiń betine shyǵaryldy
ASTANA. QazAqparat - Taılandtyń soltústiginde sý basqan úńgirde eki apta boıy qalyp qoıǵan jasóspirimderdiń tórteýi jerdiń betine shyǵaryldy. Bul týraly qutqarý operatsııasynyń basshysy Narongsak Osotthanakon málim etti, dep habarlaıdy QazAqparat BBC-ge silteme jasap.
Onyń aıtýynsha, qutqarylǵan tórt jasóspirimniń jaǵdaıy jaqsy. Olardyń barlyǵy aýrýhanaǵa jetkizildi.
Qazirgi tańda operatsııa toqtap tur. Onyń kelesi kezeńi búgin tańerteń bastalady.
«Biz qutqarý operatsııasyn daıyn bolǵan kezde jalǵastyramyz. Bizge barlyq ballondardy ottegimen toltyryp, bardyq júıeni tekserý qajet», - dedi Osotthanakon baspasóz máslıhatynda.
Operatsııaǵa 90 súńgýir, sonyń ishinde 40 Taıland azamaty qatysyp jatyr.
Eske sala ketsek, 23 maýsym kúni Taılandtaǵy ulttyq park qyzmetkerleri úńgirge kire beriste mototsıkl men velosıpedterdi, sporttyq jabdyqtardy taýyp alǵan. Olar jergilikti fýtbol komandasyna habarlasyp, ol jaqtan tabylǵan zattardyń shynynda da 11-16 jas aralyǵyndaǵy 12 mektep oqýshysyna jáne 25 jastaǵy bapkerge tıesili ekenin rastaǵan. Olar adasyp ketken úńgirdiń ishi 10 shaqyrymdyq joldarǵa bólingen. Birneshe shyǵatyn jáne kiretin bólikteri bar. Taıland bıligi úńgirde habarsyz ketken balalardy qutqarý jumystaryn júrgizip jatyr.
