Taılandta týrıstik avtobýs aýdarylyp, 18 adam qaza tapty
ASTANA. KAZINFORM — 26 aqpan kúni Taılandtyń Bangkok qalasynan shyǵysqa qaraı ornalasqan Prachınbýrı provıntsııasynda týrıstik avtobýs tejegish júıesiniń isten shyǵýyna baılanysty aýdaryldy. Jol apatynan 18 adam qaza taýyp, 23 adam jaraqat aldy.
Reıter agenttiginiń habarlaýynsha, úsh qabatty úsh týrıstik avtobýspen memlekettik qyzmetkerler ekskýrsııaǵa shyqqan. Apatqa ushyraǵan jolaýshy mingen kólik sol toppen birge saparǵa attanǵan.
Polıtsııanyń málimetinshe, avtobýs ishinde 49 jolaýshy bolǵan. Olardyń barlyǵy – Taıland azamattary. Oqıǵa ornynda 17 adam qaza tapty, taǵy bir adam aýrýhanaǵa jetkizilgennen keıin kóz jumdy.
Sheneýnik Sofonnyń málimdeýinshe, tómen túsip kele jatqan jolda avtobýstyń tejegishi isten shyǵyp, júrgizýshi kólik basqarý múmkindiginen aıyrylǵan.
Taılandta jol qaýipsizdigi standarttarynyń tómen deńgeıde oryndalýy jáne jol ınfraqurylymynyń nashar kúıde bolýy saldarynan jıi kólik apattary bolady. 2023 jylǵy esep boıynsha, Taıland jol-kólik oqıǵalarynan qaza tapqandar sany boıynsha 175 eldiń ishinde 9-orynda tur.
Ótken jyly Taılandta mektep avtobýsy gaz ballonynan aqaý shyǵýyna baılanysty órtenip, 23 adam qaza tapqan, onyń ishinde 16 oqýshy bolǵan.