Taılandta týrıstik oryndarda lańkestikke qarsy sharalar kúsheıtildi
ASTANA. QazAqparat - Taılandta Bangkoktyń kýrorttarynda, saýda ortalyqtarynda, ekskýrssııalyq týrlarǵa kiretin shirkeýler men kórikti jerlerde, sondaı-aq shekarada lańkestikke qarsy sharalar kúsheıtildi. Bul týraly jeksenbi kúni, 21 aqpanda, jergilikti polıtsııaǵa silteme jasap TASS habarlady.
«Bizdiń arnaıy qyzmet ótken jyldyń sońynan bastap joǵary ázirlik jaǵdaıynda jumys isteýde. Biz barlyǵyna mán berip, barlyq jaǵdaıdy nazarda ustaımyz. Alaıda dúrligýge esh negiz joq», - dep málimdedi Taıland Ulttyq qaýipsizdik keńesiniń bas hatshysy Thavıp Netnııom.
Arnaıy qyzmette eldiń ońtústik óńirleriniń separatısteri lańkestik áreketke daıyndalyp jatqandyǵy týraly málimet bar, dep habarlady Taıland polıtsııa bastyǵynyń orynbasary Srıvara Ransıbrahmanakýl. Jergilikti baspasóz habarlaǵandaı, AQSh elshiligi polıtsııa basshylyǵyna «Islam memleketi» tarapynan Ońtústik Shyǵys Azııa elderine lańkestik qaýip týraly eskertý jiberdi.
