Taılandta týrısterdiń avtobýsy apatqa ushyrady
ASTANA. QazAqparat - Taılandtyń ortalyq bóligindegi Pathýmthanı provıntsııasynda bolǵan jol-kólik apaty saldarynan alty adam qaza taýyp, 50-ge jýyq adam zardap shekti, dep habarlaıdy QazAqparat tilshisi The Bangkok Post-qa silteme jasap.
Polıtsııanyń habarlaýynsha, Bangkok qalasyna qaraı júrgen ekiqabatty avtobýs 6 qańtar kúni jergilikti ýaqytpen caǵat 03:20-da (Astana ýaqytymen saǵat 04:20) aýdaryldy. Jolaýshylardyń aıtýyna qaraǵanda, jol apaty kezinde jańbyr jaýyp turǵan, al avtobýs júrgizýshisi basqa kólik quralymen soqtyǵyspaý úshin tejegishti basyp qalǵan.
Jol-kólik apaty saldarynan bir er adam, tórt áıel jáne bir sábı qaza tapty. Sonymen qatar, 50-ge jýyq adam túrli jaraqat alǵan. Qutqarýshylar zardap shekkenderdiń barlyǵyn jaqyn jerdegi aýrýhanalarǵa jetkizdi.
Polıtsııa suraý júrgizý úshin aýrýhanaǵa jetkizilgenderdiń arasynda bolýy múmkin avtobýs júrgizýshisin izdeýde.
Almas Jeksenbekov
