Taılandta týrıster avtobýsy apatqa ushyrap, 13 adam qaza tapty
ASTANA. QazAqparat -Taılandtyń soltústik-shyǵysyndaǵy Chaııaphým provıntsııasynda shaǵyn avtobýs pen júk kóliginiń qaqtyǵysýynan 13 adam opat boldy.
Eldiń Besinshi ulttyq telearnasynyń habarlaýynsha, dúısenbi kúni tańerteń Bangkoktan Nong Býalamphý provıntsııasyna jolǵa shyqqan shaǵyn avtobýs joǵary jyldamdyqpen joldyń qarsy betine shyǵyp ketip, tirkemesi bar júk avtokóligine soǵylyp qalǵan. Qaqtyǵystan keıin shaǵyn avtobýs ortqa orandy.
Saldarynan 13 adam oqıǵa ornynda mert boldy, taǵy tórt adam jaraqattandy.
Polıtsııa qyzmetkerleri avtobýstyń Vetnamnan ekskýrsııaǵa shyqqan týrısterdi ákele jatqanyn naqtylady. Qaıǵyly jaǵdaı avtobýs júrgizýshisiniń jolda uıyqtap ketýinen oryn alǵan degen boljam bar.
