Taılandta tasbaqanyń asqazanynan 5 keli moneta tabyldy
ASTANA. QazAqparat - Bangkokta Chýlalongkorn ýnıversıteti veterınarııa kafedrasynyń qyzmetkerleri teńiz tasbaqasynyń asqazanynan 5 keli moneta shyǵardy.
Bul týraly Bangkok Post basylymy habarlady.
25 jastaǵy analyq tasbaqanyń asqazanynan 915 dana moneta shyǵaryldy. Ota tórt saǵat boıy júrgizilgen. «Mundaı kólemdegi tıyndy jutyp qoıǵany tań qalarlyq», - dedi veterınar Pasakorn Brıksvana (Pasakorn Brikshavana). Dárigerdiń aıtýynsha, bul onyń tájirıbesindegi alǵashqy jaǵdaı.
Tasbaqa bir apta mal dárigerleriniń qaraýynda bolady, odan keıin teńiz tasbaqalaryna arnalǵan Sea Turtle Conservation Center zoobaǵyna jiberiledi.
Kóptegen týrıster Taılandqa qaıtyp oralýdy yrymdap, tasbaqalar ómir súretin sý qoımasyna moneta laqtyrady. Al jergilikti turǵyndar tasbaqalar sekildi uzaq ómir súrý úshin shaqa laqtyratyn kórinedi.
