Taılandta premer-mınıstrge eki kúndik úzildi-kesildi talap qoıyldy
ASTANA. 2 jeltoqsan. QazAqparat - Taılandta oppozıtsııa kóshbasshysy Sýtep Taýgsýban premer-mınıstr Iınglak Chınavatpen kezdesip, «bılikti halyqqa qaıtarý» úshin úkimettiń eki kún ýaqyty bar ekenin habarlady. Ol bul týraly atalǵan kezdesýden keıin habarlady, dep jazady sheteldik BAQ.
Onyń sózine qaraǵanda, kelissózder barysynda taraptar ymyraǵa kele almady. Sonymen qatar oppozıtsııa ókili eger talaptar oryndalmaǵan jaǵdaıda narazylyq bildirýshiler qandaı is-qımyldarǵa baratyndyǵyn naqtylap ótti.
Budan buryn narazylyqqa qatysýshylar úkimettiń otstavkaǵa ketýin talap etip, Bangkokte úkimettik mekemelerdiń, telekompanııalardyń jáne bas polıtseılik basqarmanyń ǵımarattaryn qorshaýǵa alǵan bolatyn. Tártipti saqtaý kúshterimen qaqtyǵystar barysynda tórt adam qaza bolyp, ondaǵan adam jaraqat aldy.
Aktsııaǵa qatysýshylar premer-mınıstr Iınglak Chınavatty qýǵynda júrgen óziniń aǵasy, ıaǵnı Taılandtyń qyzmetinen túsirilgen burynǵy úkimet basshysy Taksın Chınavattyń buıryqtaryn oryndap otyr dep aıyptaýda.
