Taılandta pırotehnıka qoımasyndaǵy jarylystan 9 adam qaza bolyp, 115-i jaraqattandy
BANGKOK. QazAqparat – Taılandta pırotehnıka saqtalatyn qoımada qýatty jarylys bolyp, 9 adam kóz jumdy, onyń ishinde úsh bala bar. Jergilikti 115 turǵyn aýyr jaraqattar aldy, dep habarlaıdy QazAqparat VVS-ge silteme jasap.
Oqıǵa Malaızııamen shekaraǵa jaqyn ornalasqan Sýngaıkolok qalasynda boldy.
Jergilikti bılik boljamynsha, órt dánekerleý jumystary kezindegi qatelikten bolǵan.
Feıerverkter qoımasynyń ǵımaraty túgel janyp ketken.
Jarylystyń qýatty bolǵany sonshalyq, ol Narathıvat provıntsııasynda ornalasqan shaǵyn qalanyń aıtarlyqtaı bóligin qıratty. Dúmpý tolqynynan kóptegen úıdiń terezesi men shatyry búlindi.
Aıta keteıik, Ońtústik-Shyǵys Azııa elderinde pırotehnıkalarǵa qatysty oqıǵalar jıi bolyp turady. Sebebi bul óńirde feıerverkter túrli merekelerde kóptep qoldanylady.
Alty jyl buryn Indonezııadaǵy pırotehnıka fabrıkasynda bolǵan oqıǵadan 49 adam kóz jumǵan edi.
