Taılandta ondaǵan myń turǵyn daýyldan seskenip úılerin tastaı qashty
ASTANA. QazAqparat - Ońtústik Taıland provıntsııasynyń teńiz jaǵalaýyndaǵy aýdandarynyń turǵyndary tropıkalyq «Pabýk» daýylynyń jaqyndap qalǵandyǵyna baılanysty úılerin tastap, qorǵanýǵa bolatyn baspanalarǵa aýysýda.
Beısenbi kúni Bangkok Post gazeti qolaısyz aýa raıy aýmaqqa 4 qańtarda jetetindigin jazdy. Bar nazar jaǵalaýdyń 220 shaqyrymy tıesili Nakhonsıthammarat provıntsııasyna tigilip otyr. Juma kúni keshke qaraı munda surapyl nóser jaýady. Soǵan oraı óńir aýmaǵynda 86 myń adam sııatyn 90 baspana daıyndaldy.
Taıland Meteorologııalyq departamenti Sıam shyǵanaǵyndaǵy daýyl batysqa qaraı saǵatyna 65 shaqyrym jyldamdyqpen jyljyp kele jatqandyǵyn eskertti.
Bıliktiń aqparatyna sáıkes jaǵalaýda turatyn 30 myń adam qaýipsiz oryndarǵa kóshirilgen. Juma kúni provıntsııadaǵy mektepterdiń bári jabylady.
Daýyldyń jaqyndap qalǵanyna baılanysty qazirdiń ózinde ondaǵan myń týrıst taılandtyń tanymal araldary men koroldiktiń ońtústigindegi kýrorttardy tastaı qashyp jatyr.
