Taılandta qýyrshaqtarǵa ushaq bıletteri satylmaq
ASTANA. QazAqparat - Thai Smile Airways áýekompanııacy qýyrshaqtarǵa ushaq bıletterin satpaq, dep habarlaıdy Haber7.com.
Bılet quny tolyq bolmaq ári olarǵa naǵyz jolaýshylarǵa qyzmet kórsetkendeı qyzmet te kórsetilmek, dep jazady 24.kz. Qýyrshaqtarǵa tiske basarlar men sýsyndar usynylmaq, alaıda avarııalyq shyǵý esiginiń janynda otyrýǵa tyıym salynyp otyr. Eger jolaýshy qýyrshaǵy úshin bılet almaıtyn bolsa, onda ol qol júgi retinde baǵalanady eken.
Taǵy bir jaıt, qýyrshaqtar áýege kóterilgen kezde jáne qoný kezinde oryndyq beldigin taǵýlary qajet. Aıta keteıik, bul tek Taılandta sońǵy kezde tanymal bola bastaǵan Luk Thep, ıaǵnı «Perishte sábıi» atty qýyrshaqqa ǵana qatysty. Olardyń baǵasy birneshe júz dollarǵa teń. Taılandtyqtar olardyń boıynda shynymen de perishte sábıleriniń jany bar ekendigine senedi. Eger olardy baptap-kútse, sáttilik ákeletindikterine de nyq senimdi.
Taılandtyqtar olarǵa qymbat brendterden kıim-keshekter men túrli aksessýarlar alatyn kórinedi. Buǵan qosa Bangkoktyń Neta Grill meıramhanasy óziniń Facebook-tegi paraqshasynda atalǵan qýyrshaqtarǵa arnap, balalar máziriniń baǵasyna teń arnaıy mázir usynatyndaryn habarlaǵan. Bir eskere ketetini, bundaı mázirdi tapsyrys berilgen kúlli taǵam tolyǵymen jelinse ǵana bere alady eken.
