Taılandta koronavırýs ınfektsııasyna qarsy jappaı vaktsınalaý bastaldy
NUR-SULTAN. QazAqparat - Taılandta koronavırýs ınfektsııasyna qarsy jappaı vaktsınalaý bastaldy, dep habarlaıdy QazAqparat Sanıtarııalyq-epıdemıologııalyq baqylaý komıtetiniń baspasóz qyzmetine silteme jasap.
Memlekette, eń aldymen, Bangkok, Phýket jáne onyń mańyndaǵy eldi mekenderdiń turǵyndary egiledi. Elordadaǵy vaktsınatsııa ortalyqtarynda kún saıyn 70 myń adamǵa ekpe salynady dep kútilýde. Boljam boıynsha maýsym aıynda elde ımmýndalǵan azamattardyń jalpy sany 6 mln-ǵa jetpek. Vaktsınatsııalaý naýqany jaqsy nátıjelerdi kórsetken jaǵdaıda, bılik elge kirýshiler úshin mindetti karantındi alyp tastaýǵa jáne ekpe saldyrǵan týrıster úshin shekteýlerdi alyp tastaýǵa nıetti.
Malta koronavırýstyq ınfektsııamen kúreste jeńiske qol jetkizýde. Ótken táýlikte elde sońǵy 11 aıda alǵash ret COVID-19 juqtyrýdyń birde-bir jaǵdaıy anyqtalǵan joq. Bul týraly eldiń densaýlyq saqtaý mınıstri Krıs Ferne habarlady. Ol otandastaryn jaýapkershilik tanytýǵa jáne pandemııamen kúresý úshin barlyq qajetti sharalardy saqtaýdy jalǵastyrýǵa shaqyrdy. Maltada eresek turǵyndardyń jartysynan kóbi koronavırýstyq ınfektsııaǵa qarsy vaktsınanyń eki dozasyn, tórtten úshi - kem degende bir dozasyn alǵan.
Chernogorııa reseılik týrısterdiń kirýine qoıylǵan shekteýlerdi alyp tastaıdy. Atap aıtqanda, endi reseılikterge PTR testiniń teris nátıjesi bar anyqtamany usynýdyń qajeti joq. Sonymen qatar, Serbııa, Kosovo, Bosnııa jáne Gertsegovına, Horvatııa, Albanııa, Belarýs, Ýkraına, Soltústik Makedonııa, Eýropalyq Odaqqa múshe elder, Izraıl, sondaı-aq COVID-19 qarsy egilgen basqa memleketterdiń azamattary úshin engizilgen shekteýler alynyp tastaldy.
