Taılandta kóligimen 250 metrlik jartastan teńizge qulaǵan týrıst aman qaldy
ASTANA. QazAqparat - Taılandtaǵy Phýket aralynda túnde 250 metrlik jartastan teńizge qulaǵan kóliktiń júrgizýshisi aýrýhanaǵa jetkizildi. Jergilikti polıtsııa zardap shekken azamattyń aldyn ala boljam boıynsha reseılik ekendigin habarlady.
Oqıǵa paraplanshylardyń arasynda súıikti orynǵa aınalǵan Pa Dang aýdanynda oryn aldy. Úlken jyldamdyqpen kele jatqan Honda Jazz kóligi jartasty jaǵadan shyǵyp ketip, teńizge qulady. Jaqyn mańda bolǵan balyqshylar shuǵyl qutqarýshylardy shaqyrtqan. Olar tiri qalǵan júrgizýshini qabysyp qalǵan kólikten shyǵardy.
Polıtsııa zardap shegýshiniń esimi Nıkolaı ekendigin aıtyp, ony reseılik azamat dep paıymdaýda. Qazirgi kezde ol aýrýhanada es-tússiz jatyr.
