Taılandta qaza bolǵan stýdent Bekbolat Jıenbaevtyń denesi Qazaqstanǵa jetkizildi - QR SІM
ASTANA. 11 mamyr. QazAqparat - Phýket aralynda jol-kólik oqıǵasynda qazaǵa ushyraǵan malaızııalyq joǵary oqý ornynyń stýdenti Bekbolat Jıenbaevtyń denesi Qazaqstanǵa jetkizildi, dep habarlady búgin QazAqparat tilshisine QR Syrtqy ister mınıstrliginiń baspasóz hatshysy Nurjan Aıtmahanov.
Budan buryn habarlanǵandaı, 8 mamyr kúni Qazaqstan azamaty Bekbolat Danııaruly Jıenbaev dostarymen Taılandqa, atap aıtqanda Phýket aralyna kelgen bolatyn, sol kúni keshte mototsıkl teýip júrip, qulap, basynan qatty jaraqat aldy, sonyń saldarynan mamyrdyń 8-inen 9-yna qaraǵan túni kóz jumdy. Onyń sebebi qatty zaqym alǵandyqtan jáne kóp qan ketýinen boldy. Bul týraly sol boıda Taılandtaǵy bizdiń elshilikke, odan ári ata-anasyna habarlandy. Ata-anasy onyń denesin Qazaqstanǵa shuǵyl jetkizýdi talap etti, osyǵan baılanysty elshilik qysqa merzimde tıisti qujattardy pysyqtap, rásimdedi jáne 10 mamyrda denesi Qazaqstanǵa jetkizildi», - dep áńgimeledi vedomstvonyń baspasóz qyzmeti.
N.Aıtmahanovtyń aıtýynsha, onyń qanynda alkogol tabylmaǵan, jol-kólik oqıǵasy kezinde onda qorǵanysh dýlyǵasy bolmaǵan.
Bekbolat Jıenbaev Ońtústik Qazaqstan oblysynyń týmasy, malaızııalyq ýnıversıtetterdiń birinde oqyp júrgen. Qazirgi sátte dıplomattar atap aıtqanda qaı joǵary oqý ornynda jáne qaı kýrsta oqyǵanyn anyqtaýda.
Sondaı-aq QR SІM baspasóz hatshysy deneni tanymaldaý shyǵynyn ata-anasy tólegenin, degenmen mundaı oqıǵalar bolǵan jaǵdaıda bıýdjetten kómek kórsetetin qarjy bolatynyn atap ótti. «Bul belgili bir ýaqytty qajet etedi, biraq ta ata-anasy tezirek alyp kelý jaǵyn qatty tapsyrdy», dedi suhbattasýshy.
