Taılandta kater apatynan 30-dan astam týrıst zardap shekti: qazaqstandyqtar týraly aqparat naqtylanyp jatyr
BANGKOK. QazAqparat – Taıland jaǵalaýynda qaıyq dabyl munarasyna soǵylyp, 35 adam zardap shekti. Reseı Federatsııasynyń 21 azamaty ártúrli jaraqat alǵan, dep habarlaıdy QazAqparat TASS-qa silteme jasap.
Eldiń Phýket provıntsııasyndaǵy densaýlyq saqtaý mınıstrligi bólimshesiniń habarlaýynsha, zardap shekkenderdiń barlyǵy aýrýhanalarǵa jetkizilgen. Vedomstvo málimetine sáıkes, «oqıǵa jaǵalaýdan 100 m qashyqtyqta, Chalong shyǵanaǵy pırsteriniń janynda bolǵan. Tótenshe jaǵdaıdyń aldyn ala sebebi – keme kapıtanynyń nemquraılylyǵy. Tergeý júrgizilip jatyr. Apat saldarynan 35 adam zardap shekti, onyń ishinde Reseı Federatsııasynyń 21 azamaty, Qazaqstannyń 8, Taılandtyń 3, sondaı-aq Gonkong, Qytaı men Ýkraınanyń 1 azamaty». Densaýlyq saqtaý mınıstrligi zardap shekken tórt reseılik pen eki taılyqtyń jaǵdaıy aýyr ekenin atap ótti.
«QazAqparat» zardap shekkender arasynda qazaqstandyqtardyń bar-joǵyn naqtylaý úshin Syrtqy ister mınıstrligine suraý joldady.
