Taılandta qarýly sarbaz kóshedegilerge oq jaýdyryp, 12 adam qaza tapty
BANGKOK. QazAqparat - Taılandtaǵy Nakhonratchasıma qalasynda sarbaz beıbit halyqqa oq jaýdyryp, kem degende 12 adam qaza tapty, dep habarlaıdy QazAqparat BBC agenttigine silteme jasap.
Kishi ofıtser Djakrafant Tomma óziniń komandırine shabýyl jasaǵan, odan keıin áskerı lagerden qarý men oq-dári alyp ketken. Sosyn býdda hramynda jáne jergilikti saýda ortalyǵynda adamdarǵa oq jaýdyrǵan, dep málim etti Taılandtyń ishki ister mınıstrliginiń ókili.
Ol qazir Terminal 21 saýda ortalyǵynyń tórtinshi qabatynda 16 adamdy kepil retinde ustap otyr, dep jazady osy eldiń TNA memlekettik jańalyqtar agenttigi.
Saýda ortalyǵyn polıtsııa qorshaýǵa alǵan, bul mańda kólik qozǵalysy shekteldi. Polıtsııa jergilikti turǵyndarǵa úıden shyqpaý jóninde eskertý jasady.
Tommanyń bul áreketke ne úshin barǵany belgisiz. Ol shabýyl kezinde áleýmettik jelige jazba jazyp otyrdy, sondaı-aq oqyrmandarynan «berilýim kerek pe?» dep suraǵan.
Bangkok Post basylymynyń jazýynsha sarbaz atyp óltirgen komandırdiń esimi - Anantarot Krase. Áskerı lagerde ol sondaı-aq 63 jastaǵy áıel men taǵy bir sarbazdy óltirgen.
Taılandtyń premer-mınıstri Praıýta Chan-Ocha oqıǵany baqylaýda ustap otyr. Ol marqumdardyń otbasyna kóńil aıtty.
