Taılandta «Kadzıkı» taıfýnynan bes adam qaza tapty

ASTANA.KAZINFORM — Taılandtyń soltústiginde «Kadzıkı» taıfýnynan qaza tapqandar sany bes adamǵa jetti, taǵy jeti adam habar-osharsyz ketken, dep habarlaıdy Bangkok Post. 

Tabıǵı apattan 6 300 adam zardap shegip, 1 800 úı sharýashylyǵy qırady.

Buǵan deıin «Kadzıkı» birneshe kún boıy Vetnamnyń ortalyq jáne soltústik aımaqtarynda soqqan bolatyn. Saldarynan jeti adam qaza taýyp, 10 myńnan astam úı men keńse sý astynda qaldy. Sondaı-aq 86 gektardan astam kúrish egistigi joıyldy.

Bılik málimetinshe, taıfýn Vetnamda toǵyz myńǵa jýyq úıdiń shatyryn búldirgen nemese ushyryp áketken. Sý tasqynynan úsh myńnan asa ǵımaratty sý basty. Myńdaǵan gektar egistik alqaby jaramsyz bolyp, shamamen eki myń bas maldy tasqyn alyp ketken. Nóser jańbyrdan el astanasy Hanoıdyń kóp bóligi sýǵa batty.

Al Qytaıdyń Haınan provıntsııasynda «Kadzıkıge» baılanysty 20 myńnan astam adam evakýatsııalandy.

Aıta ketelik Qytaıdaǵy nóser jaýyn jol ınfraqurylymyna 2,2 mıllıard dollar zalal keltirgen.