Taılandta hantavırýsqa baılanysty Ońtústik Amerıkadan kelgender tekserilip jatyr
ASTANA. KAZINFORM – Taıland bıligi krýız laınerindegi hantavırýs indetinen keıin Ońtústik Amerıkadan keletin týrısterge sanıtarlyq baqylaýdy kúsheıtti, dep habarlaıdy Armenpress agenttigi.
Jergilikti BAQ málimetinshe, kúsheıtilgen monıtorıng engizilgennen beri Ońtústik Amerıka elderinen kelgen 470 jolaýshy tekserýden ótken. Ázirge kúdikti ınfektsııa jaǵdaılary anyqtalmaǵan.
Buǵan deıin krýız laınerinde Dúnıejúzilik densaýlyq saqtaý uıymy hantavırýstyń 11 jaǵdaıyn rastaǵan bolatyn. Úsh adam qaıtys boldy. Oqıǵadan keıin jolaýshylar Kanar araldary mańynda evakýatsııalanǵan.
The Nation gazetiniń habarlaýynsha, Taıland sońǵy alty apta ishinde óńirdiń 13 elinen kelgen azamattardy tekserip jatyr. Týrısterdiń dene qyzýy ólshenip, yqtımal aýrý belgileri naqtylanýda.
– Qaýipti aımaqtardan kelgen jolaýshylar qyzba men bulshyqet aýrýy sekildi belgiler boıynsha tekseriledi, – delingen jarııalanymda.
Sonymen qatar bılik shetelden oralǵan azamattardy densaýlyq jaǵdaıyn muqııat baqylaýǵa shaqyrdy. Eger dene qyzýy kóterilip, aýyrsyný nemese entigý baıqalsa, dárigerge dereý qaralyp, sapar baǵyttary men janýarlarmen yqtımal baılanystar týraly habarlaý usynyldy.
Eske sala ketsek, sáýir aıynda Argentınadan Kabo-Verdege baǵyt alǵan krýız kemesinde jeti adam vırýs juqtyrǵan. Olardyń úsheýi kóz jumdy.
Sonymen qatar Izraılde Shyǵys Eýropadan oralǵan jolaýshydan alǵash ret hantavırýs tirkeldi.
Buǵan deıin DDU MV Hondius kemesindegi naýqastarmen baılanysta bolǵan adamdarǵa 42 kúndik karantın saqtaý jóninde keńes bergen edi.
Sondaı-aq hantavırýs anyqtalǵan krýızdik kemeden evakýatsııalanǵan sońǵy top Nıderlandyǵa ushatyny týraly jazdyq.
