Taılandta ǵalymdar salmaǵy 30 tonna bolatyn alyp dınozavrdyń súıegin tapty
ASTANA. KAZINFORM — Taılandta paleontologtar eń úlken dınozavrdy anyqtady. Bul alyp zaýropod shamamen 113 mıllıon jyl buryn ómir súrgen, uzyndyǵy — 27 metr, salmaǵy 28 tonnaǵa jetken, dep habarlaıdy Reuters.
Taılandtyń soltústik-shyǵysyndaǵy Chaııaphým provıntsııasynda ejelgi shópqorekti dınozavrdyń qaldyqtary tabyldy. Alǵashqy súıek fragmentterin jergilikti turǵyn baıqap, keıin ǵalymdar birneshe jyl boıy qazba jumystaryn júrgizdi. Zertteýshiler omyrtqa, qabyrǵalar, jambas súıekteri jáne qol-qolqa súıekteriniń bólikterin, sonyń ishinde 1,78 metrlik ıyq súıegin tapty.
Jańa túrge Nagatitan chaiyaphumensis ataýy berildi. Ol salmaǵy aýyr, kishkentaı basy men uzyn moıyny jáne quıryǵy zaýropod dınozavrlar tobyna jatady. Zaýropodtar tarıhtaǵy eń iri qurlyq janýary retinde tanylǵan.
Ǵalymdardyń baǵalaýy boıynsha Nagatitan-tyń salmaǵy 25-ten 28 tonnaǵa deıin bolǵan. Bas súıek pen tisteri tabylmaǵanymen, paleontologtar onyń basqa zaýropodtar sııaqty negizinen konýstyq ósimdikter men tuqymdy paporotnıktermen qorektengen dep boljaıdy.
Uzyndyǵy men kólemine qaramastan, Nagatitan Ońtústik Amerıkanyń alyp túrleri — Argentınozavr men Patagotıtan sııaqty dınozavrlarǵa qaraǵanda kishkentaı, olardyń uzyndyǵy 30 metrden asqan.
Tolyq ólshemdi Nagatitan chaiyaphumensis qalpyna keltirilgen nusqasy Bangkoktaǵy mýzeıge qoıylǵan.
Osyǵan deıin Qytaıdyń soltústiginde dınozavrdyń tasqa aınalǵan izi tabylǵany týraly habarladyq.
