Taılandta el namysyn qorǵaǵan 4 jeńil atlettiń barlyǵy «altyn» aldy
NUR-SULTAN. QazAqparat - Qazaqstandyq jeńil atletter «Thailand Open Track & Field 2019» halyqaralyq týrnırinde tórt altyn medal jeńip aldy, dep habarlaıdy QazAqparat.
QR Ulttyq Olımpıadalyq komıtetinen málim etkendeı, Taıland ashyq chempıonatyndaǵy tórtinshi «altyndy» ıadro laqtyrýshy Ivan Ivanov ıelendi. Ol qarsylastaryn 18,95 metr kórsetkishimen jeńdi. Ekinshi orynda taıpeılik - Ma Veı Haý (16.78), úshinshi orynda - malaızııalyq Muhammad Zolkeflı (16.71).
Buǵan deıin habarlaǵanymyzdaı, týrnırge el namysyn qorǵaýǵa tórt sportshy attanǵan bolatyn. Buǵan deıin Polına Ivanova (syryqpen sekirý), Marııa Ovchınnıkova (úsh qarǵyp sekirý) jáne Elızaveta Matveevalar (bıiktikke sekirý) jeńis tuǵyrynyń eń bıik satysyna kóterildi.
Baıraqty báseke 18-21 mamyr kúnderi aralyǵynda ótti. Ashyq chempıonatqa 17 memleket pen 4 kásibı klýb qatysty.
