Taılandta balalardy evakýatsııalaý jalǵasyp jatyr
ASTANA. QazAqparat - Seısenbi kúni tańerteń Taılandta úńgirden balalar men jattyqtyrýshyny evakýatsııalaý boıynsha tótenshe-qaýipti operatsııanyń úshinshi kezeńi bastaldy, dep habarlaıdy QazAqparat CBS NEWS-ke silteme jasap.
Jeksenbi kúni tórt bala qutqarylsa, dúısenbi kúni taǵy tórteýi úńgirden jerdiń betine shyǵaryldy.
Qutqarý operatsııasynyń basshysy olardy kún saıyn tórt adamnan evakýatsııalaýdy josparlap otyrǵanyn málim etti. Qutqarý operatsııasy kóp ýaqytty alady, sebebi barlyq ottegi ballondaryn toltyrý úshin 20 saǵat qajet.
11-16 jas aralyǵyndaǵy balalar men 25 jastaǵy jattyqtyrýshy jeti shaqyrymdyq Tham Lýang úńgirine qamalyp qalǵan. Olar kezekti jattyǵýdan keıin ony zertteý úshin barǵan. Taılandta kenetten sý tasqyny bolyp, sonyń saldarynan úńgirden shyǵa almaı qalǵan. Qutqarýshylar olardy 10 kún boıy taba almaǵan.
Ár balaǵa eki daıverden tartyldy. Olar evakýatsııa kezinde úńgirdiń qaýipti tar ótkelinen ótýge kómektesýde.
Tańerteń Taıland bıligi qalǵan balalar men jattyqtyrýshyny búgin tańerteń evakýatsııalaıtynyn málim etti. Ázirge qutqarý operatsııasyna Ilon Masktyń Taılandqa jetkizilgen shaǵyn sýbmarınasy qatysatyny belgisiz.
Aıta keteıik, qutqarý operatsııasy óte qaýipti. Onyń barysynda ár balaǵa súńgýir maskasy kıgiziledi. Operatsııa kezinde balalar eshteńe kórmeıdi, sebebi úńgirdegi sý tunyq emes. Súńgýirlerdiń biri ottegi ballonyn ózine tartyp, balany ustap turady. Al, ekinshi súńgýir artynan júzip otyrady. Osy ýaqyt ishinde úsheýi de laı sýda joǵalyp ketpes úshin tartylǵan arqannan ustap otyrýy tıis.
Olar sý astynda barlyǵy 2,5 mıl (3,2 shaqyrym) qashyqtyqty júzip ótýi kerek.
Súńgýirler keı jerlerde balany jiberip otyrýǵa májbúr. Sebebi, úńgirde eni 15 dıýım (38 santımetr) bolatyn tar ótkel bar. Keıin dárigerler qutqarylǵan balalardy tekseredi.
Eske sala ketsek, 23 maýsym kúni Taılandtaǵy ulttyq park qyzmetkerleri úńgirge kire beriste mototsıkl men velosıpedterdi, sporttyq jabdyqtardy taýyp alǵan. Olar jergilikti fýtbol komandasyna habarlasyp, ol jaqtan tabylǵan zattardyń shynynda da 11-16 jas aralyǵyndaǵy 12 mektep oqýshysyna jáne 25 jastaǵy bapkerge tıesili ekenin rastaǵan. Olar adasyp ketken úńgirdiń ishi 10 shaqyrymdyq joldarǵa bólingen. Birneshe shyǵatyn jáne kiretin bólikteri bar. Taıland bıligi úńgirde habarsyz ketken balalardy qutqarý jumystaryn júrgizip jatyr.
Sondaı-aq, kanadalyq-amerıkalyq ınjener jáne ónertapqysh Ilon MaskTaılandta sý alǵan úńgirde qamalyp qalǵan oqýshylardy qutqarýǵa arnalǵan shaǵyn sýasty qaıyǵyn oılap tapqany týraly jazǵan bolatynbyz.
